وعندك واحد انتماء على طرابيزة المثقفين

وعندك واحد انتماء على طرابيزة المثقفين
***************************

جاء بعد موعده عكس عادته وجلس غاضب ينفخ نارا كأنها حمم خرجت من باطن بركان وقبل ان القى عليه السلام بادرنى قائلا حاجة تزهق الواحد عايز يطفش او يهاجر اى بلد ولو حتى فى داهية , قلتله ايه العباره ياعم .. براحة شوية علينا ... قالى لاشوية ولا هباب انا كرهت خلاص البلد دية , وكان كلامه فيه جديه وحدة وعزم فقلتله مداعبا فين الانتماء بقى للبلد وتراب الوطن اللى ادتك كل حاجة ومااخدتش منك ولا حاجة , فرد قائلا بقولك ايه انا مش رايق لتريأتك ولا هزارك
, قلتله انا بتكلم بجد , قالى هو انت من البلدى ولا من جنبها وحيات ابوك ياشيخ
ماتعمليش زى الجماعه المثقفين اللى بيطلعو علينا فى التلفزيون كل شويه ويكلمونا عن حب البلد الى دايبين فيه وترابها اللى بيتوضو منه وانتمائهم اللى رضعو واتفطموا عليه .. وتلافى الواحد فيهم لابس بدله من ايطاليا وحاطت برفان من باريس ومتعلم فى امريكا وبيكلمك عربى بلكنه امريكانى وولاده اللى من الخواجاية عايشين فى بلاد بره وكل اللى كان بيربطه بالبلد انه كان بينزل اجازة
كل سنه ولمدة شهر وكان بيبقى متنكد وهو نازل اجازة ولولا ابوه وامه واخواته عايزين يشفوه ماكان نزل ابدا .. وكان طول ماهو اعد يقول عندنا فى بلاد بره .. وعندكم انتم هنا , ولما ربنا فتح عليه وبقى مسؤول كبير اصبح بيسبح بالوطن والولاء ليه مع انه مازال محتفظ بالجنسية الاجنبية اللى حفى علشان ياخدها .. وكل مايصدق يلاقى فرصة سفر ولا اجازة يطير على هناك . ..

قلتله طيب طالما الموضوع كده وعايز تتكلم جد تعالى ننقاش موضوع الانتماء
قالى اهو كدة الكلام عفارم عليك فقلتله اهى (( عفارم عليك )) دية تركى مش مصرى فضحك .

المهم قلتله علشان نناقش الموضوع ده لازم نتفق الاول على مبدأ يطرحه السؤال التالى : هل الانتماء فطرى ولا مكتسب ؟؟؟
.... فيه ناس بتقول انه فطرى يتولد مع الانسان ويبدأ يجرى فى دمه مع لبن السرسوب اللى هيرضعة من صدر امه والكلام ده بيرد عليه ناس تانية وتقول انه غلط والدليل انه مكتسب بدليل ان الطفل لو اتولد وعاش سنتين تلاتة فى بلده وسافر الى بلد اخر وعاش فيها بقية عمره فهيكون ولائة للبلد اللى عاش فيها اغلب عمره كله ومثال لذلك رئيس امريكا اوباما اللى له جزور افريقية وله جزور مسلمه لكن ولائة للبلد اللى عاش فيه .. وبالتالى يكون الولاء مكتسب .

فرد وقاللى ياعم بلاش الكلام المجعلص ده بتاع المثقفين وتعالى نحسبها ونقولها بالبلدى كدة .. ياواد ياشحته هات لعمك احمد سطل خروب ورش عليه شوية ولاء من فوق علشان يصحصح ويتكيف ويفؤقلى كدة للكلام .
واستمر فى كلامه وقالى انا اعرف ان الولاء يكون لما : 1-

1 -لما تكون الدوله بتوفرى الاكل والسكن والتعليم وفرصة الوظيفة
2- لما مايكنش فيه فرق بين وزير وغفير فى الحقوق والواجبات
3- لما الامير فيليب زوج ملكة بريطانيا ياخد مخالفة مرور لانه ساق سيارته
باكثر من السرعة المسموح بها ويكون مهدد بسحب رخصته

4- لما يصدر قصر بكينجهام اعتزار رسمى لمواطن عجوز عادى جدا ليس له حيثية لان سواق احدى السيارات الملكية طلع امريكانى فعمل صوت وكان فيه راجل عجوز من عامة الشعب اعد بيتشمس فى جنينه وصوت العربيه خضة
5- لما يبقى ولاد احد رؤساء الوزاره معرض للمحاكمة لان ابنه ضبط بيشرب ماريجوانا او مخمور
6- لما يبقى صوتى فى الانتخابات ينجح عضو او يسقط حكومة حزب
7- لما اخرج انا وولادى ومراتى ناكل ايس كريم وانا رئيس اكبر دوله فى العالم بقميص وبنطلون كاجول زى زى اى مواطن فى البلد
8- لما امشى بعربيتى بجوار موكب رئيس الوزاء وماتعردش للضرب بالنار
او ان سيارة الشرطة توقفى بالربع ساعة على ماموكب رئيس الوزراء او حتى الوزير يعدى بسلامة الله ويوصل مكتبه ويشرب القهوه بتاعته كمان
9- لما ادخل المستشفى الحومى واتعالج على نفقة التأمين الصحى كانى بتعالج
فى مستشفى خاصة سبع نجوم ويعاملنى الدكتور والممرض بوجه بشوش
كانى زبون وخايف اطير منه واروح لمكان اخر
10- لما يوقفنى البوليس فى الشارع ويبرز لى بطاقته انه شرطى ويملى على حقوقى ويقولى من حقك تلتزم الصمت وتستدعى محامى واى كلمه هتقولها هتتحسب عليك
11- لما رئيس دولتى يخاطب رئيس دوله تانية علشان مواطنه غلبانه من بلدنا اتجوزت من مواطن البلد التانية وجزها حرمها من رؤية طفلها
فيضع رئيس دولتى ضمن مباحثاته واجيندته هى المشكله ليناقشها وتتابع وزيرة خارجيتى الموضوع حتى تتمكن المواطنه من رؤية ابنتها
10 – لما يخرج رئيس دولتى ويقول احنا اخطئنا فى حربنا الفلانيه
11 – لما يكون كل قرش ادفعة للضرائب هلاقية بيرجع تانى ليا فى صورة خدمات
12- لما رئيس الوزرء بتاعى يتم مساءلتة من قبل النائب العام عن بعض مصادر دخلة وهو مازال فى الحكم
13 – لما ادخل قسم الشرطة وماضربش على قفايا او تتاخر الخدمه المطلوبه وازعق باعلى صوتى واقول انا مواطن بدفع الضرائب ليه خدمتى اتاخرت
14- لما الوزارات المتعاقبه تتولى مباحثات الافراج عن جاسوس لى فى سجن دوله مقابل عوده بعض المساجين لدى دون ملل او كلل وفى كل اجتماع يكون هذا الامر احد الموضوعات فى اجيندة مباحثاتى
15- لما تقيم دولتى الدنيا وتقعدها وتوقف مباحثات السلام او تعتبر اساس استمرارها استرجاع جندى مخطوف من عندى ... او تتفاوض من اجل استرجاع رفات عدد2 جنود ماتوا فى ارض دوله معادية او فى ارض دوله اجنبيه باى ثمن حتى لو كان هذا الثمن هو بضع مئات مما فى السجون لدى من ابناء تلك الدوله.
16- لما دولتى تتابعنى وانا خارج اراضيها ولو حصل لى مشكله اجد السفير او القنصل العا م بشخصة امامى يدافع عنى ويحصل لى على حقى .
17- لما يحاكم الاجنبى الذى يخالف القانون على ارضى مثله مثل اى مواطن ولا يكون له اى امتياز عنى
18-لما بلدى تاخد رأى فى كل مشروعاتها وقوانينها وتستمد من رأى وصوتى شرعيتها ووجودها
19- لما صوتى الانتخابى مايتزورش او يجى واحد يتولى السلطة غصب عنى
وان ماعجبنيش اشرب من البحر او الترعة لان البحر اتبنى عليه قرى سياحية
وسكنه علية القوم برضة والمسؤولين
20- لما تتلغى عبارة ممنوع دخول الهنود والكلاب فى بلدى زى مااتلغت فى الهند
21 - لما ياخد المسؤول قرار واقوم انا اقطع قراره وارمية فى وشه واقوله قرارك هذا لايعنى عندى شئ ولا يساوى الحبر الذى كتب به ولا يتم اعتقالى
22- لما يخرج رئيس دولتى علشان يرثى مغنى مات فى بلده مجرد مغنى .
23- لما اكون عندى حريه ولااخشى من شئ ومن حقى اقول اللى انا عايزه
من غير مايتقبض عليا .. ولما تحترم حريتى الشخصية وماقيش حد بيتصنت على تلفوناتى او ماشى ورايا عسكرى بيراقبنى
24- لما اتنافس مع واحد على رئاسة الوزراء وافوز بالمنصب ومع ذلك اخده نائب لى او وزير خارجيتى ونتعاون معا من اجل مصلحة بلدى العليا

[frame="10 98"]عندها فقط هقول انا عندى انتماء ... [/frame]


انتهى كلام صاحبى فقلتله صدعت دماغى منك للى كلة دراع جوزها ... يالله حاسب على المشاريب وتعالى روحنى بعربيتك واثناء العوده وقفتنا لجنة مرور وسحبت رخصة صديقى لا لمخالفه صدرت منه ولكن لان البيه الظابط ماعجبهوش شكلنا
علشان كنا بنسمع ام كلثوم مش مايكل جاكسون او عمر دياب او تامر حسنى

ما جاء به صحيح وكلنا نتمنى ذلك ليسود العدل والمساواة
ولكن هذا لا يعطيني الحق ان أكره بلدي لوجود سلبيات .
كل بلدان العالم لها سلبياتها وايجابياتها وان كانت تتراوح

وليبقى الحب لأرض الوطن مهما تعددت به التعقيدات
وكلنا يعلم الحكمة (لو دامت لك ما أتصلت غيرك) تحيتي

فعلا اذا الولاء فطري ولكن في اطراف تعززه او تقلل منه ومهما فشلت هذه الاطراف في تعزيز الولاء
تظل قوة الايمان والضمير الحي هي الحد الفاصل والمسير للإنسان
والصبر الصبر مفتاح الفرج دائما ،قال تعالى:(وبشر الصابرين )

ربما ميايعانيه الفرد فى المجتمع يجعله فى حالة ضيق
مما يراه ليس من الوطن نفسه ولكن من يتولون امره