العودة   منتديات زهرة الشرق > >{}{ منتديات الزهرة الثقافية }{}< > همسات وخواطر

همسات وخواطر زهرة النثر والخواطر - همس المشاعر - عذب الكلمات - حنين الذكريات - بوح القــلم - مشاعر وأحاسيس - مشـاعر عشق حالمة

إضافة رد
 
أدوات الموضوع
قديم 26-01-09, 09:42 AM   #1

هيفاء
سفيرة زهـرة الشرق

رقم العضوية : 1615
تاريخ التسجيل : Apr 2004
عدد المشاركات : 4,287
عدد النقاط : 10

أوسمة العضو
لاتوجد أوسمة لـ هيفاء
بيرم التونسي


نبذة عن حياة بيرم التونسي
بيرم التونسي : (1893- 1961)
ولد الشاعر الشعبي محمود بيرم التونسي في الإسكندرية في 3 مارس 1893م ، وسمي التونسي لأن جده لأبيه كان تونسياً ، وقد عاش طفولته في حي شعبي يدعى " السيالة " ، إلتحق بكُتّاب الشيخ جاد الله ، ثم كره الدراسة فيه لما عاناه من قسوة الشيخ ، فأرسله والده إلى المعهد الديني وكان مقره مسجد أبي العباس ، مات والده وهو في الرابعة عشرة من عمره ، فانقطع عن المعهد وارتد إلى دكان أبيه ولكنه خرج من هذه التجارة صفر اليدين .
كان محمود بيرم التونسي ذكياً يحب المطالعة تساعده على ذلك حافظة قوية ، فهو يقرأ ويهضم ما يقرؤه في قدرة عجيبة ، بدأت شهرته عندما كتب قصيدته " بائع الفجل " التي ينتقد فيها المجلس البلدي في الإسكندرية الذي فرض الضرائب الباهظة وأثقل كاهل السكان بحجة النهوض بالعمران ، وبعد هذه القصيدة انفتحت أمامه أبواب الفن فانطلق في طريقها ودخلها من أوسع الأبواب .
أصدر مجلة المسلة في عام 1919 م وبعد إغلاقها أصدر مجلة الخازوق ولم يكن حظها بأحسن من حظ المسلة .
نفي إلى تونس بسبب مقالة هاجم فيها زوج الأميرة ( فوقية ) ابنة الملك فؤاد ، ولكنه لم يطق العيش في تونس فسافر إلى فرنسا ليعمل حمّالاً في ميناء ( مرسيليا ) لمدة سنتين ، وبعدها استطاع أن يزوّر جواز سفر له ليعود به إلى مصر ، فيعود إلى أزجاله النارية التي ينتقد فيها السلطة والاستعمار آنذاك ، ولكن يلقى عليه القبض مرة أخرى لتنفيه السلطات إلى فرنسا ويعمل هناك في شركة للصناعات الكيماوية ولكنه يُفصل من عمله بسبب مرض أصابه فيعيش حياة ضنكاً ويواجه أياماً قاسية ملؤها الجوع والتشرد ، ورغم قسوة ظروف الحياة على بيرم إلا أنه استمر في كتابة أزجاله وهو بعيد عن أرض وطنه ، فقد كان يشعر بحال شعبه ومعاناته وفقره المدقع . وفي عام 1932 يتم ترحيل الشاعر من فرنسا إلى تونس لأن السلطات الفرنسية قامت بطرد الأجانب فأخذ بيرم يتنقل بين لبنان وسوريا ولكن السلطات الفرنسية قررت إبعاده عن سوريا لتستريح من أزجاله الساخرة واللاذعة إلى إحدى الدول الأفريقية ولكن القدر يعيد بيرم إلى مصر عندما كان في طريق الإبعاد لتقف الباخرة التي تُقلّه بميناء " بور سعيد " فيقف بيرم باكياً حزيناً وهو يرى مدينة بور سعيد من بعيد ، فيصادف أحد الركّاب ليحكي له قصته فيعرض هذا الشخص على بيرم النزول في مدينة بور سعيد ، وبالفعل استطاع هذا الشخص أن يحرر بيرم من أمواج البحر ليجد نفسه في أحضان مصر .
بعدها أسرع بيرم لملاقاة أهله وأسرته ، ثم يقدم التماساً إلى القصر بواسطة أحدهم فيعفى عنه وذلك بعد أن تربع الملك فاروق على عرش مصر فعمل كاتباً في أخبار اليوم وبعدها عمل في جريدة المصري ثم نجح بيرم في الحصول على الجنسية المصرية فيذهب للعمل في جريدة الجمهورية ، وقد قدّم بيرم أعمالاً أدبية مشهورة ، وقد كان أغلبها أعمالاً إذاعية منها ( سيرة الظاهر بيبرس ) و ( عزيزة ويونس ) وفي سنة 1960م يمنحه الرئيس جمال عبد الناصر جائزة الدولة التقديرية لمجهوداته في عالم الأدب . ولكن مرض الربو وثقل السنين يتمكنا من شاعرنا ليتوفى في 5 يناير 1961م .
غنّت له أم كلثوم عدة قصائد مما ساعد على انتشاره في جميع الأقطار العربية ، وظل إلى آخر لحظة في حياته من حملة الأقلام الحرة الجريئة ، وأصحاب الكلمات الحرة المضيئة حتى تمكن منه مرض الربو وثقل السنين فيتوفى في 5 يناير 1961م بعد أن عاش 69 عاماً .




اجمل القصائد لبيرم التونسى


سيداتى

ميت ألف راجل بما فيهم من الشنبات
ما يجوش في ضافر صباع واحده من الستات
مهوش عجب - كل يوم تتقلب البورصات
سعر النهارده الأراضي تنقلب سماوات


دخلو على البرلمان في خفة العصافير
بدون ليحيا و ليسقط و لا تجعير
و بدون فضايح و لا فوضى و لا تكسير
باتت لكل اللغات تتجاوب الاذاعات


( الناخبون ) شفتهم بالعُصي والنبابيت
ساحبهم (المحترم) عالقسم تصويت
و لجل يثبت وجودهم كسروا الحوانيت
ما خلوا دكان يبيع كشري و لا شربات


يا سيداتي اهجموا و اتقدموا على طول
خطوا كمان خطوه واحده تبلغوا المأمول
إيد المره في الزمان ده كل حاجه تطول
والخيبة راكبة الرجال،اللي اسمهم بهوات

يا ريت وزارات زمان كلها فساتين
و برلمانات زمننا تمتلي حلوين
لكان بدال البارود الورد و الياسمين
و لا كانش نص الخلايق يندفن في الصين
و نصهم ينجزر في معركة برلين
ايه اللي نابنا من الأقطاب والأساطين
غير الهموم و النكد و الحرب و الأزمات


...............................

ياهـــــل المغنـــى

يااهل المغنى دماغنا وجعنا

دقيقه سكوت لله

داحنا شبعنا كلام ماله معنى

ياليل وياعين ويااّه


طلعت موضه غصون وبلابل

شابط فيها حزين

شاكى وباكى وقال موش عارف

يشكى ويبكى لمين

واللى جابت له الداء والكافيه

طرشه ماهش سامعاه

يااهل المغنى دماغنا وجعنا

دقيقه سكوت لله


ردى عليه ياطيور بينادى

وارمى له الجناجين

وانت كمان يابور الــــوادى

قل له رايح على فين

قل له اياك يرتاح يابابـــــوره

ويريحنــــــــــا معــــــاه

ياهل المغنى دماغنا وجعنا

دقيقه سكــــــوت لله


كل جدع فرحان بشبابه

يقول فى عنيه دمـــوع

ياللى جلبتى شقاه وعذابه

حلّى لنــــا الموضــــوع

طالع نازل يلقى عـــــوازل

واقفــــــــه بتستنــــــاه

ياهل المغنى دماغنا وجعنا

دقيقه سكوت لله


حافضين عشره اتناشر كلمه

نقل من الجـــــــــورنال

شوق وحنين وأمل وأمانــــــى

وصد وتيـــــــه ودلال

واللى اتعـــاد ينزاد ياخــــــــــوانا

وليل ونهــــــــار هـــوّاه

ياهل المغنى دماغنا وجعنـــــــــــا

دقيقه ســكوت لله

...............................


باريس تقول قصّروا الفساتين



باريس تقول قصّروا الفساتين....نقصرها
ترجع تقول طّولوا 00 حالاً نجرجرها
و في الشتا - قوّروا القمصان00نقورها
و في الصيف زرّروا الأرّواب000نزررها

و تقول باريس أحلقوا الشنبات ، نحلقها
و تقول لنا الدقن مودة اليوم ، نلزقها
و تقول لنا استعملوا الشورتات ، نسبقها
و تقول كمان اقلعوا الطرابيش ، نكعورها

و تقول ((فيينا)) ارقصوا00نحيّ ليالينا
و تقول ((موناكو)) العبوا00نفتح نوادينا
و تقول ((جلاسجو)) اشربوا،نسكرلهاطينة
و الخمرة قال مش حرام و الجوزة نكسرها

عميان و عايزين لنا مجانين تسحبنا
و لو يخوضوا بنا الأوحال يعجبنا
مين شاف خلافنا أمم بتحب جزارها

يارب تسلم باريس و تصوم وتصلي
و تكون موضتها سبح ولاّ طرح تلي
عشان ما تصبح سعاد وأم الهنا و نيللي
غير ربنا ذو الجلال ما يشوفش ضوفرها


..........................

الفــــــــلاح



الأوله آه والتانيه آه والتالته آه

الأوله عيرونى . إن نا فلاح

والتانيه أزرع وأقلع اللى نام وارتاح

والتالته آه للى أحبه شط منى وراح

* * *

الأوله عيرونى ان نا فلاح – بدفيه

والتانيه أزرع وأقلع اللى نام وارتاح – فى دهبيه

والتالته آه اللى أحبه شط منى وراح – فى صبحيه

* * *

الأوله عيرونى ان نا فلاح بدفيه – وعيشى حاف

والتانيه أزرع وأقلع اللى نام وارتاح فى دهبيه – بمقداف

والتالته آه اللى أحبه شط منى وراح فى صبحيه – ما قال لى عواف

* * *

الأوله مش بإيدى دا قضا محتوم

والتانيه ومسيرها ناس تغرق وناس حتعوم

والتالته ميت هم يرحل ألف هم يدوم

الأوله آه والتانيه آه والتالته آه

...........................................

قصيدة من روائع بيرم التونسي

القلب يعشق كل جميل


القلب يعـشق كـل جميل ,,,,,وياما شفت جمال يا عين
واللي صدق في الحب قليل,,,,,وإن دام يدوم يوم ..ولايومين
والـلـي هـويته اليوم,,,,,دايـم وصـــالــه دوم
لا يعاتـب اللي يتـوب,,,,,ولا في طـبـعـه الـلـوم
واحــد مفيـش غيره,,,,,مــلا الوجــود نـوره
دعـــانـي لبيتـه,,,,,لحـد بـاب بــيـتـه
ولــمـا تـجـلالــي ,,,,,بالــدمـع نـاجـيـتـه
********************

كـنـت أبـتـعد عـنـه,,,,,وكــان يـنـادينـــي
ويـقـول مـصـيرك يـوم,,,,,تخـضـع لـي وتـجـينـي
طاوعــني….. ياعـبـدي ,,,,,طـاوعـنـي أنا وحــدي
أنـا الـلـي أعـطـيـتك,,,,,مـن غـير مـا تـتـكـلـم
وأنـا الـلـي عـلـمـتك,,,,,مـن غـير مـا تـتـعـلـم
والـي هـديـتـه إلـيـك,,,,,لـو تـحـبـه بـاديــك
تـشـوف جـمـأيـلـي عـلـيـك

من كـل شـئ …أعـظـم ,,,,,ســلـم لـنـا تـسـلـم
دعــانـي لــبـيـتـه,,,,,لـحـد بــاب بـيـتـــه
ولـمـا …. تـجـلالـي,,,,,بـالـدمـع نـاجــيــتـه
*****************
مـكـه وفيها جبال النـور,,,,,طـالـه علي البـيـت الـمعمور
دخـلـنا بـاب الـسـلام,,,,,غـمـر قـلـبـنـا الـسـلام
بـعـفـو رب غـفـور
فـوقـنا حـمـام الحـمي,,,,,عــدد نــجـوم الـسـمـا
طـأيـر علينـا يـطـوف,,,,,ألـوف تـابـع الـــوف
طايريهني الـضـيـوف,,,,,بالـعـفـو والـمرحـمـة
والـلـي نـظـم سـيـره,,,,,واحــد مـفـيـش غـيره
دعــانـى لـبــيـتـه,,,,,لـحـد باب بـيـتـه
ولــمـا تـجـلالــى,,,,,بالــدمـع نـاجـيـته
****************

جـيـنـا عـلـى روضـه,,,,,هــالـه من الـجـنـه
فـيهـا الأحـبـة تـنـول,,,,,كـل الـلـى تـتـمـنى
فـيـهـا نـور عـلـى نور,,,,, وكـاس مـحـبـة يدور
والـلـى شـرب …. غـنـى

ومـلايـكـة الـرحـمـن,,,,,كـانـت لـنـا … نـدمـان
بالـصـفـح والـغـفـران,,,,,يـنـولـو مــــا نـلـنا
يـاريـت حــبـايـنـا,,,,,يـنـولـوا مــــا نـلـنا
يــارب تــوعــدهـم,,,,,يــارب واقــبــلـنـا
دعـــانـى لـبـيـتـه,,,,,لـحـد بــاب بـيـتــه
ولــمــا تـجـلالـى,,,,,بالــدمـع نــاجــتــه

كلمات : محمود بيرم التونسي
لحنها : رياض السنباطي
غنتها كوكب الشرق أم كلثوم


توقيع : هيفاء


يا عندليب ما تخافش من غنوتك
قول شكوتك واحكي على بلوتك
الغنوة مش ح تموتك انما
كتم الغنا هو اللى ح يموتك

عجبي





زهرة الشرق
zahrah.com

هيفاء غير متواجد حالياً   رد مع اقتباس
قديم 26-01-09, 09:48 AM   #2

هيفاء
سفيرة زهـرة الشرق

رقم العضوية : 1615
تاريخ التسجيل : Apr 2004
عدد المشاركات : 4,287
عدد النقاط : 10

أوسمة العضو
لاتوجد أوسمة لـ هيفاء
رد: بيرم التونسي


( من كلمـــة هايفـــه .. )


مــن هفــوه أو كلمــه هايفــــه نتحمــق ونقــــوم

نســب ونــدب ، ويـــــدور العــــــراك بالشــــــــوم

وكل محمـــوق ولــه فرقـــــــه تقــوم بهجــــــــــوم

مــن قبـــل ماتعـــرف الظالـــم مــن المظلــــــــــوم

تبقــى الشـــراره حريقــــه والسحابـــه حســــوم

لا شركـــه تنجــح ، ولا عيـــله صفاهـــا يـــــــدوم

ومنــين نشـــوف العـــدل ولا السفينــــــه تعــــوم

مادمنـــا فــوق قلبــــها قاعديــن لبعض خصـــــوم

تضحــــك عليـــنا الحــدادى فى السمــا بتحــــوم


**************

الشـــــــــــــــرق

*************

من قبل مااكتب أنا عارف القــــــول ضايــــع

والأجــر بالتأكيد ذاهــب حسب الشـايـــــع

والشتــم حايجينى مسوجر من واد صـــايــع

مهما انكويت بالنار والزيـت برضــك فنــــــــان

************

يا مصرى وانت اللى هاممنى من دون الكل

هزيـــــل ويحسبك الجاهــــل عيّان بالسـل

من دى الكيــوف اللى تصبّر على كثر الذل

ونمــت والعالـــــم فايـــــــق قوم بص وطـلّ

وشوف الشعوب واتغص ودوب وارجع انسان

*********

واللى اّلمـــــنى وبكّـــــانى انت ياشــــامى

ع الأكل نازل طول عمــرك بارد حـــــــامى

وقـــلت لى لمّا نهيتــــــك مصرى حـــرامى

لحـــد ماالجزّار خــــلاّ جرحـك د ا مــى

والله الخروف سايب معلوف مايفوته جعـــان

*********

والمغـــربى المسلم راخر أبو زر فاشـــــوك

لما انتقدتــه فزع قــال لى يلعن .... بــــوك

ونا اللى قصدى أشوف قيده ...يصبح مفكوك

لقيته فرحـان به راضـــــى طيّب .. مبـروك

خليك فقيــر دق البنديـــر وكل التغبــــان

*********

روح العراق راخر قول له كيف الأحــــــــــــوال

لامتى تفضل يا أخيينــا بحزام وعقــــــــــــال

ما تعرف الجاز بستعمـل غير للمشعـــــــــــال

ألطــم بقى وقول ويّايــا الجاز أمــــــــــــــوال

واوعى المداس يفلت تحتاس وتقول لى أمان

***********

يا شرق فيك جــو منّـــــور والفكر ظـــــــــلام

وفيــــــك حراره ياخسـاره وبرود أجســــــــام

فيـــك سبعميت مليون زلمه لكن أغنــــــــــــام

لا بالمسيح عرفوا مقامهم ولا بالاســــــــلام

هى الشموس بتخللى الروس كداهو بدنجـان


************

توت عنخ آمون

في مصر كنت الملك لك جيش ولك حاميه

ودوله غير دولتك ما تعمل الموميه

و امه غير امتك ما تزرع الباميه

ولما خشوا عليك المقبره يلاقوك

نايم مفتح .. ولكن في بلد عـميه

-----------------------

غاندي


الســلام لك والسلامه
من هنا ليــوم القيامــه
ياللى أظهرت الكرامـــه
بعد عهد المرسليـــــــن
............
ياللى من لعبك بمغــزل
تطلع البورصات وتنـــزل
فوق دماغ لندن وتعــزل
لا نكشــــير الغزالـــــــين
.............
فيلسوف مايخيبش قولك
كل فلسفتك فى نولـــــك
والتلاميذ اللى حولـــــــــك
بالمكاكيــــــك شغاليـــــــن
...............
لنجليز عايشين فى لــــذّه
عندهــم أسطــول وعــــزّه
وانت تضربــــــــــهم بمعـزه
سوده بنت اربـــــــع سنين
..............
من هنا تيـــجى المقالـــــب
اللى مغلوب يبقى غالـــــب
واللى مطلوب يبقى طالب
والهزيل ياكـــــل الســـمين
...............
قول بدل بفتيــــــــــك وبيرى
يطبخوا بســـــيرج بابــــــورى
والبودنج ان كان ضــــــــرورى
ياخدوا حته من العجـــــــــين
............
لا نجليـــــز تاخد ما تـــــــــــدّى
بالحفـــــــــــان من كل هنـــدى
واتنبـــــح صوتك ياغانــــــــــدى
ماالتقيـــــتش المنصفـــــــــين
............
قول مادام الحـــــــق ضايــــــع
والغرض بيــــــــع البضـــــــايــع
الحرام ســــــاتر وســــــــــايـــع
ولا نمـــــــشى عريانــــــــــــين
..............
يخضعـــــوك ليه للتجــــــــــــاره
ونت فى أرض الحـــــــــــــــراره
كل قرش يروح خســــــــــــــاره
فى الزفيـــــــــر والنفتالــــــــين
...............
كل واحــــــد عنـــــــده معــــــده
ماســـــكه روحه خدها قاعــــده
ان طمع تخـــــــلق له أعـــــــــدا
يقعـــــــــــدوا له مرصصــــــــــين
...............
عالقضــــــيب والقطر ماشـــــــى
يصــــــــبح العصيان بــــــــــلاشى
ون عملهــــــــــا ومااكتفاشـــــــى
يبقى يــــــــــاكل عزرائيـــــــــــــن
...............
ولا ياكـــــــــــل م المنــــــــــــــاجم
فحــــم به ع الدنيا هاجـــــــــــــــم
واللى به داس ع الجماجــــــــــــم
أحيــــــــــا ولا ميتـــــــــــــــــــــــين
..............
يازعيـــــــــــــم الهـــــــند صومـــــك
حبّب العــــــــــــــــالم فى قومــــك
وانتهت حجّـــة خصـــــــــــــومـــــك
اللى باتـــــــــــــوا ملبـــــــــــوخيــن
..............
كلهـــــــــم واقعــــــين فى حيــــره
يعقـــــــدوا جلســــــــــات كبيــــــره
فوق موائـــــــــــــد( مستديــــــــــره)
يعنـــــــــــــى لســــه محلقــــــــــين
............
يغضب الحاكـــــــــم لنصحـــــــــــــك
يحبســـــك ويعود يصالحــــــــــــــــك
وانت تستعجب وتضحـــــــــــــــــــــك
عالجبـــــــــــــــــابره القحطانـــــــــين
................
يحسبـــــوك طالــــــــب جرايــــــــــــه
ترعــــــــــــبك هزة عصــــــــــــــــــايه
يلتقـــــــــــــوك ياغانــــــــــــــــدى اّيه
فى الجهـــــــــــــــــــاد صايم سجين
.................
كام زعيــــــم فى الدنيا مثــــــــــــلك
يرضى يــــــــــــاكل زى أكلــــــــــــــك
ولا يلبس زى شـــــــــــــــــــــــــــكلك
كلّهم متحفلطــــــــــــــــــــــــــــــــــين
..................
اللى بـــــات ناصب مشــــــــــــــــــانق
واللى خايـــــــف م الشــــــــــــــــرانق
واللى اهـــــــــــــــو بايت يعانــــــــــــق
واللى قدامـــــــــــــــــــه الطحـــــــــين
..........

قصائد بيرم
المجلس البلدى
قد أوقعَ القلبَ في الأشجانِ والكَمَدِ

هوى حبيبٍ يُسَمّى المجلس البلدي

أمشي وأكتمُ أنفاسي مخافة َ أنْ

يعدّهـا عاملٌ للمجلسِ البلـدي

ما شَرَّدَ النومَ عن جفني القريحِ سوى

طيف الخيالِ خيال المجلسِ البلدي

إذا الرغيفُ أتى ، فالنصف ُ آكُلُهُ

والنصفُ أتركُه للمجلس البلدي

وإنْ جلستُ فجَيْبِـي لستُ أتركُهُ

خوفَ اللصوصِ وخوفَ المجلسِ البلدي

وما كسوتُ عيالي في الشتاءِ ولا

في الصيفِ إلاَّ كسوتُ المجلسَ البلدي

كَــأنَّ أٌمّي بَلَّ اللهُ تُربتها

أوصَتْ فقالت : أخوك المجلس البلدي

أخشى الزواجَ إذا يوم الزفافِ أتى

أن يَنْبَرِي لعروسي المجلسُ البلدي

ورُبَّمَا وَهَبَ الرحمنُ لي ولداً

في بَطْنِهـا يَدَّعيه المجلس البلدي

وإنْ أقمتُ صلاتي قلتُ مُفتتحاً

اللهُ أكبرُ باسم المجلـس البلــدي

أستغفرُ الله حتى في الصلاةِ غَدَتْ

عِبادتي نصفُها للمجلـس البلـدي

يا بائعَ الفجلِ بالمِلِّيـمِ واحدةً

كم للعيالِ وكم للمجلسِ البلدي


...................................


الجماهير

م المستحيل إنت تخدع أي طفل صغير

و تلف عقله و تعطيه القليل بكتير

لكن بأهون طريقه تخدع الجماهير

لو كنت أغبى غبي تجري وراك و تسير

* * *

خليل يصقَّف, يصقف شعب ويا خليل

من غير ما يسأل عن الأسباب والتفاصيل

* * *

و حمار يغني, وجايب من يقول له: آه

حالاً تقول الخلايق كلها ويّاه

* * *

الحق يخفى وفي وسط الزحام ينداس

وناس في فهم الحقيقه, تتكل على ناس

ويساعدك الحظ ياللي تحسن التجعير




----------------------------------------------------------


الصنم

هبط الجنيه من قمّته و المليونير : ضج و لطم

و لما تهبط ذمته الحزن ينساه و الألم

و لما تسقط حرمته يظن روحه محترم

عنده الجنيهات كل شيء و كل شيء غيرها عدم

* * *

أما الفقير قام و استجار و من الهلع قلبه انخلع

بايت يفكر .. ليل نهار ليرتفع سعر السلع

و اللحمه اهيه و الخضار أسعرها حتسوق الدلع

ياما الجنيه رخّص رجال و غَلىَّ أسعار الغنم

* * *

دي جيفه منتنه صار ابن آدم عبدها

فليسقط الصنم الجنيه اللي بتسجد له الأمم



توقيع : هيفاء


يا عندليب ما تخافش من غنوتك
قول شكوتك واحكي على بلوتك
الغنوة مش ح تموتك انما
كتم الغنا هو اللى ح يموتك

عجبي





زهرة الشرق
zahrah.com

هيفاء غير متواجد حالياً   رد مع اقتباس
قديم 26-01-09, 10:00 AM   #3

هيفاء
سفيرة زهـرة الشرق

رقم العضوية : 1615
تاريخ التسجيل : Apr 2004
عدد المشاركات : 4,287
عدد النقاط : 10

أوسمة العضو
لاتوجد أوسمة لـ هيفاء
رد: بيرم التونسي





عتاب

ليه امشى حافى ،وانا منبت مراكيبكم
ليه فرشى عريان،وانا منجّد مراتبكم
ليه بيتى خربان ،وانا نجّار دواليبكم
هى كده قسمتى؟
الله يحاسبكم!

ساكنين علالى العتب،وانا اللى بانيها
فارشين مفارش قصب،ناسج حواشيها
قانيين سواقى دهب،ونا اللى ادور فيها
يارب ماهوش حسد
لكن بعاتبكم

من الصباح للمسا،والمطرقه فيدى
صابر على دى الاسا ! حتى نهار عيدى
ابن السبيل انكسى ، واسحب هرابيدى
تتعروا من مشيتى
واخجل اخاطبكم

ليه تهدمونى وناللى عزكم بانى
انا اللى فوق جسمكم قطنى وكتانى
عيلتى فى يوم دفنتى مالقيتش اكفانى
حتى الاسيّه وانا راحل وسايبكم؟



--------------------------------------------------------------------------------

بدنجان

يا شرق فيك جو منور

والفكر ضلام

وفيك حراره يا خساره

وبرود اجسام

فيك تسعميت مليون زلمه

لكن اغنام

لا بالمسيح عرفوا مقامهم

ولا بالاسلام

هي الشموس بتخلي الروس

كدا هو بدنجان




................................

سيد درويش



من بعد موته بعام طلعت لنا أقوام

حطّوا عليه مَكَدام و قالوا فنُّه قديم

* * *

قديم و سوقه بار و شغل طبله و طار

و شبعانين أدوار و شبعانين تقسيم

* * *

هُوَّ القديم يا قوم يقدم في ليلة و يوم

هو بصل أم توم و لاَّ بلح إبريم

* * *

ده فنه لو ينزاع و ف تسجيلات يتباع

لتصبحوا صياع ما تكسبوش مليم

* * *

أنا عشقت بكام ؟ و نا هويت يا سلام

و منيتي دي غرام أروح معاها غريم

* * *

هو العظيم يا ناس في أرضكم ينداس

و التافه الهلاَّس نشبعه تكريم ؟

* * *

قولوا تخمنا السوق حتى صبح مخنوق

بفننا المسروق من إرث كل يتيم







الجماهير



م المستحيل انت تخدع أي طفل صغير

و تلف عقله و تعطيه القليل بكتير

لكن بأهون طريقه تخدع الجماهير

لو كنت أغبى غبي تجري وراك و تسير

. . . .

* * *

خليل يصقَّف , يصقف شعب ويا خليل

من غير ما يسأل عن الأسباب و التفاصيل

* * *

و حمار يغني , و جايب من يقول له : آه

حالاً تقول الخلايق كلها و يّاه

* * *

الحق يخفى و في وسط الزحام ينداس

و ناس في فهم الحقيقه , تتكل على ناس

و يساعدك الحظ ياللي تحسن التجعير







جهل .. فقر .. مرض



الجهل قال للصنايعي : إخلف المواعيد

و قول لهم بعد بكره , و بعد بكره.. عيد

واحلف لهم بالطلاق , إن القديم دا جديد

تفوت عليه السنه , يقعد يِنِشّ و حيد

و يبتدي الفقر , و الأمراض , و التشريد

في مره يسرح بقُفَّه : يا حمش و يا لذيذ

و يوم يبيع يانصيب إن كان صنعه تفيد

و يوم في عركه العساكر يسحبوه في حديد

و لما ينصاب براجعه أو بتيفوئيد

تقول أُمه : دي عين حطت عليك يا بعيد







الصنم



هبط الجنيه من قمّته و المليونير : ضج و لطم

و لما تهبط ذمته الحزن ينساه و الألم

و لما تسقط حرمته يظن روحه محترم

عنده الجنيهات كل شيء و كل شيء غيرها عدم

* * *

أما الفقير قام و استجار و من الهلع قلبه انخلع

بايت يفكر .. ليل نهار ليرتفع سعر السلع

و اللحمه اهيه و الخضار أسعرها حتسوق الدلع

ياما الجنيه رخّص رجال و غَلىَّ أسعار الغنم

* * *

. . . . .

دي جيفه منتنه صار ابن آدم عبدها

فليسقط الصنم الجنيه اللي بتسجد له الأمم







رأس المال



جبان يفزع و يتخبىَّ إذا هَبَّ النسيم حبَّه

و لما تعصف الأرياح يخلي حبته قُبَّه

* * *

و لما يقولوا دي مظاهره بريئة من بنات طاهرة

بنوك القطر و القاهره تحط القفل و الضبه

* * *

و لو عيل بزماره نفخ في أيها حاره

يقول الليلة فيه غاره و أنا اللي حاكل الضربه

* * *

. . . . .

يا رأس المال يا متدلِّلْ عايز لك للسكن منزل

فراشه ورد و قرنفل و روضة فيها تتربَّى







بخمسين قرش



بخمسين قرش ترفع ميكرفونك

لوش الفجر , و زيادة شويه

و خمسين قرش , توضع نص درهم

في جيب خصمك و ترميه في بليِّه

و خمسين قرش , تنهب أجزخانه

من المستشفيات القاهرية

و خمسين قرش , يعفيك المفتّش

من الغرامات , و يشطب لك قضيه

و خمسين قرش , تتبدّل محاضر

بتهمه عليك و تتحوّل عليه

و خمسين قرش , شيخ حارتك يخلِّي

ولادك , يهربوا من العسكريه

و خمسين قرش , محفظتك تعود لك

من النشال بالوسطه القويه

و خمسين قرش أكتب لك مقاله

بأنك من رجال العبقريه





* * * * * *

22/02/1922 - تصريح بريطاني بمقتضاه أصبحت مصر ملكية و أصبح السلطان فؤاد ملكاً على مصر

رسالة من منفاه في تونس تهنئة يقول فيها



و لما عَدمْنا بمصر الملوك

جابوك لانجليز يا فؤاد قَعَّدُوك

تمثِّل على العرش دُور الملوك

لا مصر استقلِّت و لا يحزنون



غنّى عدلي فخري- بخمسين قرش و التهنئة- في حفلات برلين الغربية عام 1974

التهنئة جرى لها تعديل في البيت الثاني= جابوك لامريكان يا سادات قَعَّدوك-





الأوله آه



الأوله آه

و التانيه آه

و التالته آه

الأوله مصر . و ف مصر قالوا تونسي و نفوني

جزات الخير

و إحساني

و التانيه تونس . و فيها الأهل جحدوني

و حق الغير

ما وافاني

و التالته باريس . و ف باريس جهلوني

و أنا موليير

في زماني

الأولى أشتكيها للي أجرى النيل

و التانيه لطَّشْتْ فيها ممتثل و ذليل

و التالته دمعي عليها غرَّق الباستيل



توقيع : هيفاء


يا عندليب ما تخافش من غنوتك
قول شكوتك واحكي على بلوتك
الغنوة مش ح تموتك انما
كتم الغنا هو اللى ح يموتك

عجبي





زهرة الشرق
zahrah.com

هيفاء غير متواجد حالياً   رد مع اقتباس
قديم 26-01-09, 10:03 AM   #4

هيفاء
سفيرة زهـرة الشرق

رقم العضوية : 1615
تاريخ التسجيل : Apr 2004
عدد المشاركات : 4,287
عدد النقاط : 10

أوسمة العضو
لاتوجد أوسمة لـ هيفاء
رد: بيرم التونسي




توت عنخ آمون



من عهد ما كتفوك في القبر يا فرعون
داست بلادك مِلل من كل شكل ولون
وخلصوا منا تار موسى وتار هارون
وبعد جور الزمن واللي جرى فينا
ظهرت لما بقى لك في المنامة قرون
.
مش عيب عليك تستخبى نص مليون حول
وكل من جاك بلادك يسأل أبو الهول
لا يبوح بسرك لا بمشاورة ولا بالقول
وجا الزمان اللي بيلاقوا المناجم فيه
عتر عليك لورد بيفتش على بترول
.
في مصر كنت الملك لك جيش ولك حاميه
في دولة غير دولتك ما تتعمل موميا
وأمة غير أمتك ما تزرع الباميا
ولما خشوا عليك المقبرة يلاقوك
نايم مفتح ولكن.. في بلد عامية

....................................
في كل عام للورد اوان.............. الا النسوان

بقدرتك نابتين الوان ............. ابيض و احمر

وانت اللي تعلم وان اجهل ............ فيه ايه اجمل

من دي الخدود اللي لا تدبل ............... ولا تتغير

ودي العيون اللي اشهد لك ................. بها و اسجد لك

دي خلت الطاغي انقاد لك ................ والمتكبر

والشفتين اللي فالقهم ................ كنت خالقهم

للابتسام و لا لازقهم ................ دانت تحير

بذمتي انت اللي جاذبني................ يا معذبني

و ياللي ذوقك يعجبني ................... لما تصور

لك صنعه في العين و الحاجب .................. بيها تتعاجب

وتقول وجود الله واجب .................... مين بيه يكفر

ولك قوالب للاجسام .....................غلب الرسام

يقلدك بحجر و رخام ...................... يلقاك اشطر

يا ست يام زناق محبوك .................. وقميص مفكوك

حطي على القلب المشبوك .................. ايدك يعمر

ويام نص ملايه حرير........................و النص يطير

على الكتاف انا عقلي صغير ..................غطى المرمر .....

وياللي ساقـك يسوى رقاب .....................حارت الباب

في لون حقيقته ان كان بشراب ...................و لا مقـشر

و ياللي خصرك له حركات ...................... تقفل شركات

ويضج منها داوود بركات ........................ لما يحرر

وياللي لابسه لي جوانتي.................... اربعه سنتى

على ايه خفيتي و بينتي ................... في اللي ما يظهر

و ياللي بالدراعات تمشي .................. و لا تحتشمي

متشمره لي وما اقدرشي ....................... عالمتشمر

و يام شمسيه عايقه .................. على فين سايقه

يا مركبه الورده اللايقه ................... ع المتشــــجر

هواكي الياسمين هافف ........................ و حلق رافف

يصافح العقد اللافف..................... على دى المنحر

يا مسلمين الله يا حريم .................. انا مالي غريم

غيركم اروح وياه في جحيم ................... يوم المحشر

الدنيا و النسوان خلاص..................... و الراجل لاص

لا طبله تـنفع و لا بلاص ............... لو يتكسر

...........................................

بينصرف له كل عام كذا وكذا
لأنه قال حافظ كذا وحافظ كذا
وعشان كمان لابس كذا ولابس كذا
وإيه نايبنا من كذا ولا كذا
وإيه يفيدنا "أحرَنجما" أجلوّذا
ومن، وفى، وعن، ولم، وهكذا
***
حرير وجوخ وسيارات وهندزا
بعضهم جارسونيرات وفنطزة
ياريته كان فران وفاتح مخبزاَ
ينفع عباد الله بَدَل هذا القَذَى
***
ويجرى ايه إذا انزفت ولا إذا
ياحبذا لو أُجرتُـه ، ياحبذا
ندفعها للأيتام بدل كسوة وغِذِا
كلام ثِقيل يتقال ولا مؤاخذة
***

اقطعوا ايد الحرامى .. بس نوبه .. واحبسونى
ون سرق واحد طماطه .. ولاطوبه .. اشنقونى
الحرامى لما يسمع .. بالساطور ..يفزع ويرجع
يشتغل و يكون عصامى
اقطعوا ايد الحرامى
الحرامى تتركوه ..يسرق و يهرب ..فى الحوارى
أو بصدفه تحبسوه ..ياكل ويشرب ..سم هارى
من جيوبنا او دمانا اللى فايضه من الخزانه
و يحامى اللة المحامى .. اقطعو
ا ايد الحرامى
عندكم يا مسلمين .. احسن شريعه ..طبقوها
حا تقول الافرنج دى احكام فظيعه ..ما يقولوها
اللى يسكن فى وادينا ..يرضى بالجارى علينا
انجليزى او سيامى
اقطعوا ايد الحرامى

000000000000000000000000

العيون

من العيون يا سلام سلم___شوف وأتعلم
تحت البراقع تتكلم____والدنيا نهار
----------------------------------
عيون تقولك أنا عارفاك___والنبى ما انساك
من يوم ما شفتك م الشباك___يا جدع يا صغار
---------------------------------
وعيون تقولك قصدك ايه___بتبحلق ليه
مالكش شغل تعس عليه___يا راجل يا حمار
--------------------------------
وعيون تقولك بالمحسوس___انا عاوزة فلوس
وان شالله حتى تحوس وتدوس___انا عاملاه كار
------------------------------
وعيون تقولك امشى يا واد___انا ام ولاد
وعيون تقولك عندى ميعاد___ويا السمسار
-----------------------------
وعيون تسبل فوق الخد___دى جد ف جد
وعمرها ما تكلم حد____عيون احرار
---------------------------
وعيون تحقق فيها بشوق___تهرب على فوق
بتقولك ابعد عنى بذوق___نظراتك نار
--------------------------
وعيون ما تعرف زعلانه___او فرحانه
صباح مسا أهى سهتانه___صاحبة أفكار


عشان ما يبقى مقامنا قبل كل مقام

ستاتنا تمضغ لبانة فى الطريق العام

ويحركوا شفتين متلحوسين بأدام

والكحل ده كل عين متكحله بجرام

واللبس نايلون فى نايلون من شراب لحزام

البمب فوضى بيعدم فى النفوس اعدام

والست وياه تترقع ترقعه بنظام

فى الموسكى والصاغه تتمخطر كده يا سلام

لما الخواجه باسيلى يقولها يا مدام





عطشان يا صبايا____عطشان يا مصريين

عطشان والنيل فى بلادكم___متعكر مليان طين

ولا نهر الرون يروينى___ولا مية نهر السين

شده وتزول يا معوض___سبحانه رب معين

دى تلات حكومات يا خوانا___ظلمونى واشكى لمين

زغروته يام سدحمد____زغروته يام ياسين

راجع اتوضى واصلى__وازور سيدنا الحسين

وابوس ايد الشيخ بلبع__وايد الباشا التخين

واقول سلامات يا خليفة___ولشعبان طيبين

واتوب على سيدى لاظوغلى__عن كار الجرانين

واتجوز بنت الماشطه___والكوديه ام اسماعين

اياك يتعدل بختى___واخدم فى الدواوين

والبس لى سموكن مقصب___وابقى البيه التخين

غيرشى جعلوا التخشيبه___للغلبان الفطين

يخرج منها ويتسوح___من مرسيليا للصين

دا جازاة الخايب اللى___يعشق بنت التسعين

شايف من تحت البرقع___أهدابها مرعرعين

ماحسبش حنكها مطبق___وسنانها مهرتمين

والفم المحمودية____والراس دى راس التين

وتحب كمان وترافق___اهل الدنيا والدين

ولا تطرد بياع رنجه___ولا بياع الفلين

وولادها اسم الله عليهم___يتعدوا بالملايين

رجاله صنايعية___بايعين وشاريين

واحد تاجر طعميه ___والتانى بتاع مصارين

واللى يبيع جوافه___واللى يبيع سردين

وواحد كمسارى افرنجى___قاعد فى وابور طحين

واتنين سارحين بكلونيا___وفانلات معتبرين

والحاج محمد برعى___له فابريكة كوانين

وأخوه له معمل طرشى__مشهور فى الكعكيين

والكل يزيد ويبارك____قاعدين متصنعين

ما ينوب الواحد منهم ___غير قفل الدكاكين

يا رازق جيش الازهر___اياك نستعين

يا برايز يام بلاد بره__يا مربيه لامرتين

بعتت لك ام الدنيا___شاعر فى الشعر متين

يعمل اشعار لبرابره___وصعايده وفلاحين

وتلامذة وأزهرية____وخوجات ومفتشين

اياك ما يموتش عندك___فى أزيل المساكين





فى كل عام للورد آوان___ألا النسوان
بقدرتك نابتين ألوان___ابيض واحمر

وانت اللى تعلم ونا أجهل___فيه ايه اجمل؟
من دى الخدود اللى لا تدبل___ولا تتغير

ودى العيون الى اشهد لك___بيها واسجد لك
دى خلت الطاغى انقاد لك___والمتكبر

والشفتين اللى فالقهم____كنت خالقهم
للأبتسام ولا رازقهم_____دانت تحير

العبد يعشق بالقوة____عشق لجوه
كمان جهنم؟ايه هوه___محناش معشر

بذمتى انت اللى جاذبنى__يا معذبنى
وياللى ذوقك يعجبنى____لما تصور

لك صنعه فى العين والحاجب__بيها تتعاجب
وتقول وجود الله واجب____مين بيه يكفر

ولك قوالب فى الاجسام__غلب الرسام
ويقلدك بحجر ورخام___يلقاك أشطر

يا ست يام زناق محبوك__وقميص مفكوك
حطى ع القلب المشبوك__ايدك يعمر

ويا ام نص ملايه حرير__والنص يطير
ع الكتاف انا عقلى صغير__غطى المرمر

وياللى ساقك يسوى رقاب__حارت للباب
فى لون حقيقته ان كان بشراب__ولا مقشر

وياللى خصرك له حركات___تقفل شركات
ويضج منها داوود بركات___لما تحرر

فوقه الحزام متشعبط فيه__النبى شديه
لتحت همسه يا روحى خليه__يبقى محرر

وياللى خايفه الفرق يميل_قامطه المنديل
طيب وصدرك بالهلاهيل__ليه متحشر

وياللى لابسالى جوانتى__اربعه سانتى
فى ايه خفيتى وبينتى___للى ما يظهر

وياللى بالدراعات تمشى__ولا تسألشى
متشمرالى ومقدرشى___علمتشمر

ويا ام شمسية يا عايقة__على فين سايقه
يا مرشقة الوردة اللايقة__عالمتشجر

هواكى بالياسمين هافف__وحلق رافف
يصافح العقد اللافف___على دى المنحر

يا مسلمين لله يا حريم__انا مالى غريم
غيركم اروح وياه فى جحيم__يوم المحشر

الدنيا والنسوان وخلاص__والراجل لاص
لا طبله ينفع ولا بلاص___لو يتكسر

عليه قفا عايز الخيه___وخلقه رديه
وجتته المشعرانيه___حاجه تقشعر

ولا الشنب والدقن يا هوه__مهما حلقوه
باين وعايز لعن ابوه____برضك أخضر


توقيع : هيفاء


يا عندليب ما تخافش من غنوتك
قول شكوتك واحكي على بلوتك
الغنوة مش ح تموتك انما
كتم الغنا هو اللى ح يموتك

عجبي





زهرة الشرق
zahrah.com

هيفاء غير متواجد حالياً   رد مع اقتباس
قديم 07-02-09, 04:05 PM   #5
 
الصورة الرمزية نشوة الموت

نشوة الموت
خطوات واثقة

رقم العضوية : 11541
تاريخ التسجيل : Sep 2008
عدد المشاركات : 63
عدد النقاط : 10

أوسمة العضو
لاتوجد أوسمة لـ نشوة الموت
رد: بيرم التونسي


هيفاء
شكرا لك امتاعنا بهذا التراث الجميل والعودة الى زمن العامية البسيطة وبيرم التونسي
صاحب الورد جميل .......شوف الزهور واتعلم والتى مازلنا نتغنى بها حتى هذا اليوم


نشوة الموت

لاحلام الشهقة الاخيرة نشوة


نشوة الموت غير متواجد حالياً   رد مع اقتباس
قديم 20-10-09, 01:06 PM   #6
 
الصورة الرمزية okkamal

okkamal
المشرف العام

رقم العضوية : 2734
تاريخ التسجيل : Apr 2005
عدد المشاركات : 14,840
عدد النقاط : 203

أوسمة العضو
لاتوجد أوسمة لـ okkamal
رد: بيرم التونسي


كنت اعددت موضوع عن بيرم التونسى لايختلف كثيرا عما نشر هنا
وبالبحث وجدت الاخت هيفاء قامت بذلك المجهود الكبير
فلك التحية على هذا الملف


okkamal غير متواجد حالياً   رد مع اقتباس
قديم 22-10-09, 02:04 PM   #7
 
الصورة الرمزية حسين الحمداني

حسين الحمداني
هيئة دبلوماسية

رقم العضوية : 11600
تاريخ التسجيل : Sep 2008
عدد المشاركات : 5,722
عدد النقاط : 10

أوسمة العضو
لاتوجد أوسمة لـ حسين الحمداني
رد: بيرم التونسي


السلام عليكم ورحمة الله وبركاته
تحيه وتقدير لما اتحتمونا به من حياة وحكايه الشاعر المبدع بيرم التونسي وماقدمتموة من ملخصا وتنوعيعا لحياة الشاعر والانسان جميل جدا تمتنا به وتذكرنا معناة الانسان المثقف الذي يحمل الفكر والعقيدة ليعش من اجلها

تحيه لدوركم الطيب والرائع


توقيع : حسين الحمداني


زهرة الشرق

zahrah.com

حسين الحمداني غير متواجد حالياً   رد مع اقتباس
إضافة رد

الكلمات الدلالية (Tags)
التونسي , تحرم

أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
الترجي التونسي بطل شمال أفريقيا لكرة القدم هيام1 الترفيه والرياضة والفروسية 0 21-01-09 01:20 PM
الإصابة تحرم السعودية من نجمها محمد نور بخليجي 19 هيام1 الترفيه والرياضة والفروسية 2 28-12-08 11:29 PM
لماذا تحرم ابنتك أو أختك من النت ..؟؟؟؟ سحر العيون حواء وآدم 15 14-11-03 10:53 AM
تحرم صورتك ماعاد تنظرها عيوني إبن حَـــــــــــــرَ ق أشعار وقصائد 11 20-08-03 12:34 PM
المفكر التونسي العفيف الأخضر الذي أثار الزوبعة : (الأسلاف يحكموننا من وراء قبورهم ) ابويافا شخصيات وحكايات 6 09-08-03 07:11 PM


الساعة الآن 10:29 AM

Powered by vBulletin® Version 3.8.12 by vBS
Copyright ©2000 - 2024, vBulletin Solutions Inc.

زهرة الشرق   -   الحياة الزوجية   -   صور وغرائب   -   التغذية والصحة   -   ديكورات منزلية   -   العناية بالبشرة   -   أزياء نسائية   -   كمبيوتر   -   أطباق ومأكولات -   ريجيم ورشاقة -   أسرار الحياة الزوجية -   العناية بالبشرة

المواضيع والتعليقات المنشورة لا تعبر عن رأي منتديات زهرة الشرق ولا نتحمل أي مسؤولية قانونية حيال ذلك

(ويتحمل كاتبها مسؤولية النشر)