الدُر المُختار لفيلم (( رد قلبى )) المِحتار (( المِحتار هنا هو القلب وليس الفيلم ))

[align=center]الدُر المُختار لفيلم (( رد قلبى )) المِحتار (( المِحتار هنا هو القلب وليس الفيلم )) هذا الفيلم يتحدث عن ظلم اصحاب الاقطاعيات للفلاحين وماقيل انه فساد سياسى للملك والحاشية الخاصة به وايضا الاحزاب السياسية , وينتهى الفيلم بقيام ثورة 23 يوليو 1952 بعد حريق القاهرة فى يناير من نفس العام . الشخصيات : شكرى سرحان فى دور ((على ))ابن الريس عبد الواحد الجناينى صلاح ذو الفقار فى دور حسين ابن الريس عبد الواحد الجناينى حسين رياض فى دور الريس عبد الواحد الجناينى ( الجناينى دا وظفته مش لقب ) زهرة العلا فى دور سنية بنت خالة على اليتيممة والمقيمة معاهم فردوس محمد فى دور زوجة الريس عبد الواحد مريم فخر الدين فى دور انجى بنت الباشا الاقطاعى احمد مظهر فى دور (( النبيل علاء )) ابن الباشا كمال يسّ فى دور زميل علي فى الجيش هند رستم فى دور الراقصة ****************** طبعا معروف ان ((علي )) كان بيحب ((انجى )) من صغرهم وكبرو سوى والباشا رافض الحب دا وبيحاربه لان الواد ((علي )) شاف الباشا قبل كدا وهو بيلعب فى مناخيره وكمان شافة وهو بيلعب استغماية مع احدى الاميرات ورجع يومها متاخر بالليل فنط من فوق الصور علشان مراته اللى ماتت ماتعرفش ولا تحس بيه وتجيلوه فى الحلم وتبهدلة زى ماكانت وهى عايشة بتعمل معاه لما يعد ياكل على الطبلية ويدلق الرُزوتخلية يشيله حباية حباية , لكن (انجى) كانت متمسكة بـ ((على )) جداومتشعلقة فى رقبته ومكلبشة فى رجلية وكمان كانت بتحبة لانه كان بيستخدم برفان شعبى جميل جدا من عصير بصل معجون فى دهن الفيل الاصفر ببُدرة عفريت الست , والبرفان دا كان بيسحرها ويخليها زى ماتكون متنومة مغناطسيا . تعالوا بقى نشوف مشاهد من الفيلم تم صياغتها بروح الفكاهة عام 2008 مشهد ************* يرجع ((علي وحسين )) الى البيت راكبين التورماى ومزوغين من الكمسرى ,وفى عيونهم الفرحة فقد ظهرت نتيجة البكالوريا ونجحا هما الاثنين وبعد التهنئة من الريس عبد الواحد ورقص عشرة بلدى من الست حرمة المصون والدُر المكنون ,والبت سنية راحت تبل شربات الورد اللى كان جالهم هدية لما اخدوا الابتدائية وتجيبة ليهم فى الكيزان النحاس للاحتفال بالنجاح , يبص الريس عبد الواحد لــ (علي ) ويقوله بصوته الاجش : هـــا .. ناوى على مدرسة اية يا (علي ياويكا ) يابنى يجاوبة (علي ويكا ) ويقوله على مدرسة الحربيه العليا يادادى يقولة واشمعنى الحربية يا (على) يابنى يرد عليه ويقولة : علشان لما اتخرج منها امسك مدفع واضرب بيه طلقةعند المغرب فى رمضان علشان تفطروا عليها يادادى طالما احنا ماعندناش راديو نسمع فية الادان يقولة ايوه عفارم عليك يابنى عرفت تخطط وتحدد مستقبلك تمام ياعلي يلتفت الريس عبد الواحد الى ( حسين ) اللى كان لسة عمال يقربع الشربات من الحلة ويقولة وانت ناوى على اية ياحسين يقوله انا ناوى على مدرسة البوليس يا فازر يقولة : واشمعنى مدرسة البوليس ياسونه ياحبيبى يقولة علشان بعد مااتخرج يبقى معايا مسدس أأجرة للعيال فى العيد بفلوس واكون مستقبلى بدرى بدرى واجبلكم كل اللى نفسكم فيه .. اجبلك انت يابا مايوه من سان مايكل اللى كان نفسك فية واجيب لأمى فستان استريتش والبت سنيه اجبلها قطة شيرازى وبلوزة بادى استومك وبنطلون بنطاجيب وكمان شراب استك منه فية من اللى طالع اليومين دول وبيسموه (( فليه )) بدل حبل الغسيل اللى بتشد بيه الشراب وزرق رجليها وعَلٍَُّم فيها . يضُم الريس عبد الواحد ولاده اللتنين ليه ويقلوهم انا كدا اطمنت عليكم وعرفت انكم رجالة بصحيح وبتخططوا لمستقبلكم كويس جدا .. ويقول لنفسه :عرفت تربى فعلا ياعبد الواحد ...اسبكم بقى و اروح احكِم ماتش الكورة فى الحارة بتاع العيال ولاد الجيران اصلهم هيدونى ربع جنية فى الماتش .. يضم الريس عبد الواحد ولادة اللتين ليه ويقلوهم انا كدا اطمنت عليكم وعرفت انكم رجالة بصحيح وبتخططوا لمستقبلكم كويس جدا .. عرفت تربى فعلا ياعبد الواحد ...اسبكم بقى و اروح احكم ماتش الكورة فى الحارة بتاع العيال ولاد الجيران اصلهم هيدونى ربع جنية فى الماتش .. فيقوم الجميع يدعي للريس عبد الواحد بالتوفيق ... يرد عليهم الريس عبدالواحد ويقلوهم ماحدش بياكلها بالساهل (( على طريقة ريا وسكنيه ))... ودا يبين لنا ان الريس عبد الواحد كان بيعمل بزينس من ورا افندينا , وكمان كان بياخد رشاوى علشان يكسب فريق على فريق .. يعنى شغال فى الدرتى بيزنس , وكلها كام سنه ويوصل للفيفا ويبقى مالتى مليونير . مشهد اخر ************ يجرى (علي) على قصر افندينا علشان يفرح انجى بالنجاح بعد مالبس اشيك حاجة عنده ...بنطلون بيجاما برجل واحدة والجاكت بتاعها من غير زراير ... ودهن شعره بالسمنه الصناعى لانهم غلابة وماعندهمش سمن بلدى زى اللى بيستخدمة البرنس علاء وانجى فى شعرهم وكمان كان ساعتها الفازلين لم يتم اختراعة _ بعد _ لاهو ولا الجيل طبعا . يقابل (انجى) خلف سور القصر وانجى ملهوفة عليه وشعرها ورا دهرها يجى مترين سايح وناعم من السمنة البلدى وكانت عرفت انه نجح فكانت محضراله هدية النجاح .. حزمة جرجير وكام خصاية بلدى من جنينة القصر بتاعتهم ,لكن الهدية ماعجبتش (علي) وماكنتش على أد المقام فــ (علي) كان متوقع من (انجى) حاجة احسن من كدا .. كان فاكرها هتجبلة حزمة بصل احمر ايطالى لكن( انجى) بخيلة وخذلت (علي) واخدت البصل الاحمر اللى كان فى الجنينه وحولته كله على غرفتها لانها بتحب تستحما بالليل وتعمل ماسك لوشها منه وكمان بتدهن جتتها كلها بقشرة البصل كنوع من الكريمات الحديثة وتقوم خابطة فحلين بصل وكلاهم علشان تتخمد بسرعة , فى حين ان (انجى) لما نجحت فى الابتدائية (علي ) مابخلش عليها باى حاجة وجبلها هديه فخمة جدا .. كيس قطيفة فيه لب على كيس فول سودانى موشى بمية الذهب . مشهد ********** يدخل (على )الكلية الحربية ويوصله جواب من انجى بتقوله فية ان احد الاعيان اتقدم علشان يخطُبها وباباها موافق وهى مش قادرة تقاوم اغراء الثراء بتاع العريس والدليل على ثرائة إن ايدة سخية جدا وغنى بطريقة فوق الوصف , وتستطرد تقول : انه لما راح يتقدم ليهم هو وامه الهانم وابوة الباشا جبلها هدية غالية جدا مخصوص من اوربا عباره عن 3 باكيتات بمبرز من الحجم العائلى , لدرجة ان كل اصحابها حسدوها على العريس اللُقطة دا .. وكل واحدة اعدت تحلم بعريس ذيه يجبلها بامبرز افخم من بتاع انجى, وانجى موحولة و مش عارفه تعمل ايه ولا تتصرف ازاى . رد عليها (علي) بسرعة بجواب على ورقة كشكول قطعها من كراسة زميله فى الفصل وقالها فيه لازم تبوظى الجوازة دية حتى لو اضطرتى تدلقى كوباية ماية على البامبرز اللى جابه عريس الغفلة , وتوريه لابوكى وتقولي له العريس دا بخيل وغشاش وجايب بامبرز مستعمل , أأأأأأأأه وماتنسيش كمان ترشى علية شوية برفان من بتاعى اللى ابوكى بيدايق من رحته . وبالطريقة دية استطاعت( انجى) عن طريق خطط ((علي)) المُفتكسة انها تبوظ الجوازة .. اصل (علي) كان بيدرس فى الكلية التخطيط العسكرى والاستراتيجيات الحربية وكيفية عمل مكائد للاعداء .. فراح مطبق الكلام على طول فى خطيب (انجى) , ونفذ الخطة بتاعة بونابرت لما حب يبوظ جوازة مراته لما كانت هتتخطب لواحد غيرة , ونفعت الخطة . . لكن (انجى) رجعت تانى بعد شهر بعتت لــ (علي) جواب تانى لان فية عريس تانى متقدم ليها وهو ظابط فى الحربية وبرضة جاب البامبرز اياه هدية لانجى لكن طلع لئيم اوى وراح فارد البامبرز أُدام الباشا ابو انجى وقاله البامبرز سليم اهوة ادامك يا أونكل .. اصلة كان دارس خطة بونابرت فى الكلية هو كمان .. فماينفعش يضحك عليه حد او يتلعب عليه ويتعمل فيه اللى درسة فى الكلية. فقام (علي) باعت ليها وقالها خلاص نطبق عليه خطة رومل ثلعب الصحراء لما بوظ و فركش جوازة اخته من خطبها .. لما مسك علبة حليب النيدوا اللى كان جايبها هديه وقام مغير الصلاحية بتاعتها وخلها منتهيه (( اكسبير دايت )) واتهمة بانه بيتاخر فى البضاعة الفاسدة والمبلولة . مشهد --------- جواب اخر ترسله انجى الى (علي) وهو من الورق ذى اللون الوردى التى تفوح منه رائحة العطرالآخاذ .. يفتح (على) الخطاب بلهفه ويجد ان الخطاب يقطر ياسا واحباطا حيث كتبت انجى لـ (على) تخبره بان ابوها الباشا وافق خلاص على الفرح من العريس الجديد وبدأ يجهز ليوم الخطوبة وقد شعرت بالضيق والغُصة فى حلقها حيث قام والدها بتاخير فستان الخطبة من وكالة البلح حيث الملابس المستعملةوهى مش قادرة تشوف الفستان ولا تيجى ناحية لان الفستان تنبعث منه رائحة عرق كريهه تشمئز منها النفس , وايضا اتفق على اقامة سرادق للفرح فى الشارع على ان يتولى الزفة الاستاذ عبد السلام النابلسى (( حسب الله السادس عشر )) بفرقته بتاعة فيلم ((شارع الحب )) وربما قام بقيادة الفرقة المايسترور جادوليوا (0 حسين رياض )) وربما صاحبهُ فى الغناء عبد الحليم حافظ . ورفضت انجى كل هذه الامور وقالت فى جوابها لــ ((علي)) انها لاتتصور الحياة بدونه وان الموت اقرب اليها من ان يلمسها رجل اخر فالحياة بدونه مستحيلة ولا تستقيم , ومما زاد من الطين بلُة ان والدها قام بحجز خيمة فى احد دول اوربا لقضاء شهر العسل وانه ايضا قام بقطع تذكرتان سفر على اول قافلة بغال راحلة الى اوربا وستقلع القافلة من مجزر السيدة زينب الدولى . هنا يصاب (علي) بالحزن وترتفع نبرة نحيبة على الحبيبة المفقودة الراحلة ,ويقرر ان يشارك فى تنظيم الضباط الاحرار حتى يقوم بثورة ويحرر البلد من كل البغال اللى فيها , تمر الايام ثقيلة متثأبة حتى ياتى يوم الاجازة فيسرع (علي) لمقابلة ( انجى) بجوار القصر كما تعودا كل اسبوع ويتحدثا سويا اثناء ركوب الخيل الخاصة بإسطبل الباشا. djيتبع[/align]

مشهد المقابلة

**********


يعود البرنس علاء من رحلة فى اوربا ويشاهد سايس اسطبل الخيل يقوم بسحب زوجان من الخيل الخشبية وعندما يساله اين ذاهب بهما يخبرة بان كل اسبوع الاميرة (انجى وعلي بيك) يقوما بركوب الخيل الخشبية فى جولة حول القصر , فيغتاظ البرنس علاء ويامر السايس بان يدخل احد الاحصنة الخشبية ويخرج بدلا منه الحصان الكهربائى اللى اسمه (عنتر) والذى يعمل بالرمود كنترول ويامر السايس كمان انه يحط للحصان اللى بالرمود كنترول حجر بطارية من ماركة (اينر جيزر) علشان الحجر دا قوى وعمره طويل علشان الحصان عنتر يفتح فى السرعة ويوقع علي من فوقه ويموت ويستريح منه ومايركبش حصانه مرة اخرى . المهم (علي) يركب الحصان الكهربائى والحصان ينطلق بسرعة جنونية , وتحاول انجى ان تنبهه لذلك لكن (علي) عمل فيها خيّال و عنتر زمانه , وفتح الحصان فى الجرى ويحاول (على) ايقاف الحصان لكن الرمود علق ومش عايز يشتغل.. طب يحاول شد فرملة اليد يلاقيها مش شغاله , الحصان يقترب من مفارق الطرق ...على ناصية الشارع يقابلة فى المواجة دبابة بلاستيكية بتاعة الواد ابن ابو سويلم فلاح كفرالهنادوة .... اعد بيلعب بيها ... فتقوم الدبابة البلاستيكه داهسة الحصان ابو رمود فيموت الحصان .. تجرى انجى بسرعة وهى بتولول زى باقى الشعب وتقول ياسبعى ياجملى يا ( علي ) .. لكن (على) يطلع منها سليم لانه اتعلق فى فرع شجرة زى القرود فى الغابة لما تتنطط على الشجر , المشكلة فى ان الحصان هو اللى راح واتكسر وبقى ميت حتة واتفكك من بعضة , المهم الخبر وصل للباشا وبعصبية سأل مين اللى كان راكب الحصان وعرف انه (علي) ابن الباش جناينى.. النار قادت فى جتة الباشا وطلبولوا المطافى .. واعد يدبدب برجليه فى الارض وهو زعلان على الحصان اللى بالرموت بتاع جده الباشا (( سلطح بابا )) لانه كان ناوى يروح بيه الملاهى فى العيد ويشترك فى السباق اللى هناك وكان نفسه يفوز بالجائزة الكبرى بتاعت السباق .. وهى مصاصة فى اخرها لبانه وصفارة مستوردة من افخر المصانع العالمية , الباشا لازم يشوف بديل الان علشان يروح بيه الملاهى فى العيد فيقرر انه يدخل المسابقة بلعبة الفيفا 2008 او بلعبة كونكور, يختار الباشا لعبة الفيفا ويختار كمان فريق تشيلسى وانه يكون مكان اللاعب دروجبا اصله يشبه الباشا وهو شباب ايام الشقاوه فى حوارى اسطنبول لما كان بيلعب هناك كوره وهو حافى القدمين.



مشهد ******** يعرف (علي) من صديق له ان انجى تعيش مأساة حقيقية مع خطيبها الجديد لان خطيبها اعد طول النهار بيلعب فديو جيم وأتارى وسايبها لوحدها وهى نفسها تلعب السلم والتعبان والليدوا لكن العريس مابيعرفش ... , ( علي)محتار و مش عارف يتصرف فى الموضوع دا , ويقرر انه يبعت جواب يواسى فيه انجى ويخبرها ان حياته بقت جحيم هو كمان من ساعة ما اتخطبت , فهو اتحرم من اكل الملوخيةبالارانب اللى كانت بتسرقهم له وكمان مش لاقى حد يخيطلة شرابته المقطوعة اللى صوابع رجليه طالعه منها ولاحد يصلح زراير البدل ولا يكوى له القمصان او يلمع له الجزمة .. وبيفكر بجديه انه ينتحر .. تنزعج انجى وتقولة اوعى تعمل كدا ياعلى ياحبيبى .. حتى وان كنا بعاد عن بعض بالجسد فيكفى ان روحنا مرتبطة ومتشعلقة مع بعضهاوان انا بطمن عليك من وقت لاخر ( بتسجدة وبتنيمة فى الكلام .. وعم علي الخايب الأهبل صدق واكل البالوظة )... وقالتله كمان دا انا مستعده اضحى بكل حاجة علشان تكون سعيد فى حياتك حتى لو اقتضى الامر ان انا احجزلك فى دار مسنين .. او اضحى بكل اللعب اللى عندى والشيكولاتات والملبسات والبونبونات حتى الشيكولاته التوكسى مستعدة اضحى بيها .. شفت اد ايه يا(على) انا ممكن اضحى بكل شئ علشانك ياحبيبى ؟؟!!! .. حتى لو اقتضى الامر ان انا احجزلك فى دار مسنين علشان يراعوك . تصعب على (( علي )) نفسة وكبريائة كـــ زابت (( يقصد ظابط )) ويقرر انه لازم ينتقم من كل الاغنياء ويحرق القاهرة لكن لازم يسكر الاول فيقرر ان يذهب الى نايت كلب (كريموززززا) بتاع الست (كريمة) صاحبة الواد اخوة حسين علشان يروش نفسه ويتفسد على حق بعد الدنيا مابهدلته واديته ظهرها وهو ابن باش جناينى اد الدنيا وامة دلالة اد الدنيا ... وبالليل فى الافراح .. بتشتغل بلانه ( البلانه هى المرأة التى تقوم بتزين العرائس فى الافراح الرفية .. ودا كان زمان قبل الاختراع اللى اسمة الكوافير وبيوت التجميل _ بيوتى سنتر _)) .


مشهد --------- يقرر (علي) الذهاب الى الكبارية وفى نيته انة يسكر سُُكر بين حتى الثمالة لما يبقى طينه .... لدرجة انه شرب كل المُسكرات سواء كانت عصير دُوم او خلافة ..حتى عصير التوت لم يتركة بل تعداه الى مايعرف بمنقوع الصُرم (( الصُورم هى الجزم القديمة )) لدرجة انه من كتر سُكره.. الناس اللى فى الكبارية كانت فاكره انها هى اللى سكرانه وهو اللى فايق ...المهم بدات اول وصلة فى النايت كلب اللى هو اعد فية وكانت عبارة عن رقصة خليعة للراقصة اللهلوبة طمطم ((وهى عروسة متحركة من خلال خيوط تربطها ويحركها احد الاشخاص )) وعلى صفارة بوجى (( وهو برضة عروسة لعبة بالخيوط )) انسجم الجمهور من الطرب , واصبح (علي ) يتمايل معها طربا على كلمات (( ادلع يارشيدى على وش المية سيب شعرى وامسك ايدى على وش المية) . هنا يقرر حسين ان يقوم بنقل اخية ( علي) وسحبة على البيت لانه اصبح مخمور لدرجة غير محتملة , فيقوم بحملة ووضعة على عربة يد يتم جرها باليد استلفها من بتاع البطاطا اللى واقف ادام النايت كلب حتى يصلا الى المنزل .


مشهد ------------ يستيقظ (علي) فى الصباح وهو ينوى على ان يتفق مع بعض محترفى الانتخابات والبلطجية اللى موجودين على قهوة البطايطة لعمل حريق القاهرة لكنه يجد ان هناك من سبقة واتفق معهم ,ويبدو انه شخص اخر تركته ((انجى بتاعته )) واتجوزت بردة واحد غيره من الشباب الخرع بتاع اليومين دول اللى تقلة بتشتغل ايه ياحبيبى .. يقولك انا مابشتغلش .. انا بصرف فقط وبابا هو اللى بيشتغل (( الاستاذ لوسى فى فيلم اشاعة حب)) . ويتم حرق القاهرة مما يعجل بقيام الثورة ويقترب (علي) من حلمه مهو طرد كل البغال من البلد , ينتشر الجيش فى البلد ويعلن احد الضباط الاحرار بيان الجيش لتطهير البلد من الملك وحاشيته الفاسدة ويقرروا ان يترك الملك البلد ويرحل على اليخت (المحروسه )حاملا معه كل ادوات الفساد ومنها البغال بعد ان يوقع عريضة التنازل على الحكم لابنه القاصر احمد فؤاد عن طريق على باشا ماهر .. تخرج الجماهير الهادرة الى الشوارع تهتف باسم الثورة وهنا يخرج الريس عبد الواحد الى البلكونه وهو يحمل العلم الاحمر ليهتف مع الجماهير للنادى الاهلى .. ابو تريكه يا فنان العب كمان وكمان ... قسم كمان وكمان وجيب فيهم احلى اجوان .. والبت سنيه تهتف وراء عبد الواحد وتقول ارقص ياحضرى .. ارقص ياحضرى , وتلتقط قناة الجزيزة هذا الحدث .. ان الريس عبد الواحد بيتكلم بعد سنوات من اصابته بالخرس بعد ماظلمة لباشا وطرده وحرمه من لعب السيجا مع البواب وتجرى معة حوار فيبدا حوارة بقولة : خد سته رايح خد اربعة راجع (( اشارة الى نتائج لقاءات الاهلى والزمالك معا فى الدورى المصرى . )) وهنا يظهر الفرق بين نادى الزمالك اللى اسسة الملك وبين نادى الاهلى اللى اسسة سعد باشا زغلول الوطنى (( معلش عقدة الخواجة لسة مسيطرة .. احنا برضة بتكلم لامؤاخدة )) ينتبه حسين لهذا الامر ويقولة يا فازر دية ثورة للجيش مش ماتش الاهلى والزمالك بتاع 6/1 . دمتك بخير وكل فيلم وانتم طيبين


همسة الاخبار الرياضيه من افكار محمد عطية وصياغة احمد المصرى

[align=center]

ما شاء الله عمي احمد

انت من وين تجيب كل الحلاوة دي



احلى من الفيلم الاصلي


[/align]

ههههههههههههه
ماتسألنيش بجيب الكلام
دا منين ... انا بعد اكتب
والافكار بتيجى باسهاب من عند ربنا

الحمد لله اننى ادخل البسمة والفرحة
الى قلوبكم
دمت بخير