تعالى إنشد أي ليبي وليبيه شن تعلمت .

شنو تعلمت من الحرب ..

ماشاء الله تعلمت هلبة حاجات

تعلمت من صوت الصاروخ نعرفه طالع .. والا نازل

ومن قوة الصوت نعرفه وين نزل في عين زارة والا الخلة والا في صلاح الدين والا في حوازة الموز والا في طريق المطار والا في معيتيقة والا في شارعناï؟½ï؟½

تعلمت شنو هو الهاون والسكود والجراد والفرق بين ضربتهم و ضربة الطيارة بدون طيار..

شفت دبابات حقيقية صح شكلها متمرمد وحالتها حليلة لكن منظرها مرعب فعلا..

تعلمت اني لازم نكون في حالة تأهب 24 ساعة، 1440 دقيقة في اليوم .. حتى واني راقدة مع ان النوم العميق نسيته

تعلمت نتشهد كل يوم اول مانحط راسي عالمخدة .. وشنو معناها بينك وبين الموت شعرة

تعلمت الاستعداد لمواجهة الأسوء وان اللي صاير هذا مقدر من ربي وامتحان يجب إجتيازه بنجاح

تعلمت ان المجازفة مرات تقصف عمرك وتودي بحياتك وحياة اهلك في لمح البصر

تعلمت ان اللي مات مات على روحه وماحد في هالبلاد هياخدلك حقك الا الله عز وجل

تعلمت ما ننحازش لأي طرف من الأطراف المتنازعة ... الحرب ظالمة والرابح فيها خاسر وكلنا هنخسروا الوطن

تعلمت ان النزوح مش اللي كلكم تعرفوه فقط ... النزوح نزوح دمنا من عروقنا قطرة قطرة في كل يوم اسود مر علينا

تعلمت كيف ناخذ نفس عمييييييق استعداداً للآتي

تعلمت .. وتعلمت .. دروس حقيقية قاسية والكلام هذا مش هيحسه الا سكان مناطق الاشتباكات في طرابلس

ومازال الحبل عجرار ..