من اشعار ايمان بكرى

الشاعرة المصرية : إيمان محمد بكري محمود
أو : إيمان بكري
شاعرة مصرية, ولدت في القاهرة 1955-01-03,
وفيها تلقت علومها الابتدائية والإعدادية والثانوية, والجامعية..
إلى أن نالت شهادة الليسانس في اللغة العربية, والدراسات الإسلامية من جامعة القاهرة, كلية الآداب.(دار علوم 1978)
كتبت الشعر وهى يافعة, وكان لمكتبة والدها دورا رائدا في توسيع مدى رؤيتها, وإطلاعها على أشعار القدامى والمحدثين..
حتى صقلت موهبتها الشعرية, نشرت بعض قصائدها في المجلات والصحف المصرية,
تعمل حاليا في تدريس اللغة العربية للمرحلة الثانوية في مصر,
وفى سنة 1990 التحقت بجامعة شعراء العروبة وأصبحت عضوا فاعلا فيها.
عملت بالتدريس ثم انتقلت إلى وزارة الثقافة منذ عام 1992.
الوظيفه الحاليه مستشار أدبي ومدير المكتب الفني بالهيئة العامة للكتاب
فازت سنة 1991 بالجائزة الأولى في مسابقة الشعر التي طرحتها الجماعة.
لإيمان بكرى عدة دواوين شعرية نذكر منها:
1. العزف على أوتار القلب.
2. ومضات قلب يحترق.
3. امرأة في سجل الزمن.
4. عجايب يا زمن.
5. الليل وخصلات الشعر.
6. المصحصحاتي.
7. أعلنت العصيان عليك.
8. قصر الكلام.
9. ذاكرة الأنامل.
10. مختارات لمكتبة الأسرة.
11. الأعمال الكاملة جزء أول .

شاركت إيمان بكرى في العديد من اللقاءات الشعرية التي تحييها الجماعة.
تكتب إيمان بكرى الشعر بنوعيه الحر والعودى ويتميز شعرها بالرقة,
وعذوبة الألفاظ, أما مواضيعه فتتركز حول انشغالها بقضاياها الشخصية خاصة وقضايا المرأة بعامة..
يذكر أن العديد من النقاد والدارسين قد قاموا بالكتابة عن هذه الشاعرة المبدعة,
من أمثال (إبراهيم عيسى ) الذي قدم لها ديوانها (امرأة في سجل الزمان) الذي صدر سنة1993.






هذه مجموعة من القصائد الرائعة للشاعرة الكبيرة الساخرة ايمان بكري







زمن تكلب والكلاب تكلبوا



زمن تكلب والكلاب تكلبوا

جيش تجيش والذئاب تكالبوا

من كهفهم حكموا البلاد فأسهبوا

وتصدعت أوجاعنا لم يرأبوا

نصف الرجال تزوجوا وتحجبوا

والنصف ينتظر السماح لينجبوا

فتقدمي يا عبل·· مرمى زينب


بشراكم·· بشراكم

هذا دمي فلتعبروا

وتجرعوا

وتعاقروا حتى الثمالة·· أبشروا

ما عاد في قلبي انبعاث

فانثروا ذراته عبر الجحيم

تنفسوا أوجاعه

ثم انفذوا

بين اشتعال الجرح

بين حرائقي

جسر جليدي

ونهر من حريق

فتراقصوا في مرقص الطغيان

واحتلوا المنافذ

والنوافذ

والطريق

إنا على سجادة الدعوات

ننتظر المسافر

والبريد

ونخبئ الصلوات خلف ضلوعنا

ويؤمنا أنصاف آلهة

على أقدامهم تنسل قافلة العبيد

فلتسكتوا جوعى النسور بنطفة من لحمنا

وبجرعة من حلمنا

لا·· لن تثور الثائرة

نحن لها عند المخاض عباقرة

عند الفرار جبابرة

فلتدخلوا كل البلاد الى محيط الدائرة

وتجرعوا دمنا النبيذي المراق

من الفرات··

الى حدود القاهرة






***************************

من اشعار ايمان بكرى



يابنت بلدي

يابنت بلدي عيب ..لما اللجام هيسيب .. يسترخصوكي الناس
في بنطلون مزنوق .. وبلوزه شبر لفوق .. ولا حتى فـ الجمباز
عريتي تحت وفوق.. ولا عدش عندك زوق .. ولاحتى فيه احساس
لحم الخروف مدبوح ..بنجيبه بعد الروح .. ما تحصّــل الأنفاس
ولحمتك بالكوم .. دكان وطول اليوم ..مفتوح لأرخص ناس
يخرب زمنا زمان .. كأنه عُمر ما كان .. لالينا اصل ولا اساس


************************


كلنا بنحبك يا حمار


بيقولوا في مطرب مكار...بيغني بحبك يا حمار
الواد ده وصولي وكداب..ومنافق وكمان نعار
وإشمعنى لوحده اللي يحبك...كلنا بنحبك يا حمار
ده لأنك فعلا متفاهم... ومبرطع فينا ومش فاهم
وبتبعد عن أي تفاهم .. بعزيمة غبية وإصرار
العِشرة ما بينا ما بتهونشي..وإن هانت..برضو ما نقدرشي
محكمة العدل ما تحكمشي..وإن حكمت.. هتولع نار
مثلتوا علينا الثلاثية.. وبطولة وكانت جماعية
وعشان ما تكمل سداسية..عملتوا ألف حصار وحصار
وفي وسط ميدان الحرية..فيه شعلة مسكاها وليّة
متكنش دي ليزا المخفية..مدية إشارة إنذار
وعلى العموم أنا حبيتك
وإلهي يا بعيد يخرب بيتك
لو يوم هتشُك في إخلاصي..وتصدق ده من الأشرار
هو سؤال ومافيهش هزار....هو أنت يعني حمار يا حمار
علشان تصدق إن الفار.. ممكن يقول لأسد يا حمار
وبعاهدك والعهد أمانه..هتّنَّك على طول ويانا
حمورية أهلك عجبانا..يا واخدنا من الدار للنار
كل الحميره هنا عملت سين...واتفقت انك بغل عظيم
هيوزعوا شربات برسيم ...علي العربخاني وعلي الزوار
أنا مش حمّار هتخاف مني
مانا برضو حمار وأحمر منك
ما تنهق..قول أي حوار
بنقولك شيي..ما بتمشيشي....والح ااا..بنقولها ما بتجيشي
ونقولك هيييسس...ما بتهيسش..ومكمل بينا المشوار
وعلشان كده إحنا إخترناك..وعلى حياتنا إستئمناك
ولا يوم هيجي يفرقنا...وهنفضل دايما وياك



*************************




ما فيش حاجه


مافيش حاجه
مانيش عايزة خلاص حاجة
ولا محتاجة انا لحاجة
ولو عايزة صحيح حاجة
مخليتوليش ولا حاجة

عموماً بصوا فيه حاجة
هقولها بس محتاجة
لعقول تفهم
ولو حاجة
مهيش مفهومة او حاجة
نفسرها بكام حاجة
نوضحها بكام حاجة
وأهى حاجة مع حاجة
هتظهر وتبان لنا حاجة
وانا ما بخفش من حاجة
مانيش مسنودة ولا حاجة
لكن ما بخفش من حاجة
لكن فرضاً لو هقول حاجة
هيحصل إيه ؟؟؟ ولا حاجة
هيعملوا إية ؟؟ ولا حاجة
و بعد الشر بعد الشر
لو واحد من القاعدين
من السامعين من الضالين
فِهِم حاجة هَيعملوا إيه ؟؟؟؟
اكيد برضُه ولا حاجة
فنتوكل على الستار لوجه الله نقول حاجة
فيه ناس بتعيش علشان حاجة
وناس بتموت علشان حاجة
وناس بتموت على الحاجة
وناس تديلك الحاجة
وتبقى ليها محتاجة
وناس تديلك الحاجة
و تاخد ادامها ميت حاجة
وناس تكبر تكون حاجة
و ناس تصغر علشان حاجة
وناس منظر ومش حاجة
وتلقاه كبيرحرس ونفير عليه منظر
وهو جبان وشيخ منصر
ولا يبـنش عليه حاجة

كلامى يا خلق فيه حاجة؟
لحد دلوقتى فيه حاجه؟
كلام عادى وبسيط جداً ولا فِهشِ ولا حاجة
ما انا ما أقدرش أقول حاجة
صحيح نفسى أقول حاجة وميت حاجة
لكن مش قادرة اقول حاجة
لأنى لو هقول حاجة
هييجى ناس بتوع حاجة
وياخدونى ورا الحاجة
وهو لو سمع حاجة
هيعملوهالى ميت حاجة

عموما بصو لو واحد من القاعدين
عاوزنى أبلغه بحاجة
يقول مايخفش من حاجة

نعم فيه إيه؟
لالالالالأ مافيش سرقه
ولا تهليب ولا تهريب ولا حاجة

وبتقول إيه
مصمصوا إيه؟ وخصخصوا إيه؟
ده كله كلام مفيش حاجه

قضية إيه؟
ياشيخ روح خلاص مافيش حاجه

حرامى إيه ؟ ولَكّح إيه؟وهرب إيه؟
شــفـافـيـه ومافيش حاجة

وبتقول إيه؟لالالآلأ عـــيب
لافيه تدليسولاترقيص
ولا تدبيس ولا حاجه

سمع مع هووووس
انا حاسسة انه فيه حاجة

دقيقة سكات لَتبقى حداد
انا حاسسه انه فيه حاجة

زمنكوا ياخلق فيه حاجة
ولازموا كام وميت حاجة
ده لو يعنى إذا كان فيه حاجة
انا عن نفسى مش حاسسة ولا بحاجة
ولا متضايقة ولا حاجة

سعادتك برضه مش زيـى مافيش حاجة ؟
أهـه بيقول مافيش حاجة

جنابك برضه مش زَيـىِ وعلشان زيي مافيش حاجة
أهـه بيضحك بيقول مافيش حاجة

ما أنا قولتلكو من الأول مافيش حاجة

عليا النعمه يا اخوانا مافيه حاجة
ورحمة ابويا ويا أبوك على إللّى جابوك ما فيه حاجه

وعهد الله . وعهد الله. وعهد الله
ما خللولنا ولا حاجه

بقلك ايه خلاص خلص و فركش
يلا يا اخونا مفيش حاجه




**************************



النساء و منصب الوزارة



قالوا الرجال إن النسا مالهمش في الوزارات
ونهار ابونا مِسا لو حكّموا الستات
في وزارة التموين و الاقتصاد بالذات
حتضيع فلوس البلد في اللبس و البوتيكات
بالذمة ده اسمه كلام
يبقى وزيرنا مدام
واسم البعيد فتكات
يختي عليه لو مشي
يدخل مجالس إشي
لابس قميص شفتشي
من كلمة واحده يختشي..وينزل صويت وعياط
يا اهل العلام والادب
اقروا التاريخ اللي انكتب..فوق الطريق علامات
كليوباترا حكمت بلد
بالحيلة ويّا الجلد
من غير لا خد ولا هات
وكام من وزير كان قفا
جه في الطريق واختفى .. ولهف وراه ألوفات
قصر الكلام يتقال .. مين فيهم اللي يفيد
مش مسالة عضلات
وساعات كتير ستات بيكونوا رجالة
ورجال بطبع النسا
وطالعلهم شنبات


******************
يتبع

[align=center]

دستور

‎ ‎
‎
دستور يا اخوانا يا بعدا‎
لأ سوري دستور م البعدا‎
‎
محبوس حابس يا سيادنا‎
و بكاكي من فوق مدنة‎
‎
و ورايا ديوك بيكاكو‎
حرصوا عالباقي معاكو‎
‎
بركة مولانا هولاكو‎
حلت و علينا اللعنة‎
‎
طرطور طرطر طراطير‎
بيغيروا فالدساتير‎
‎
و لا عاد في الحتة كبير‎
و يا وارث تورث مين‎
‎
ما الورث إتباع و إتبعنا‎
نرجع تاني لموضوعنا‎
‎
و بيان لديار الإفتا‎
من جمهورية زفتا‎
‎
لِعبو و عملوها إستفتا‎
صوت ياللي سامعنا‎
‎
و قوللي ملك ولا كتابة‎
أسد شبل ف الغابة‎
‎
و أحلف وحياة راس بابا‎
زفة فمولد كدابة‎
‎
و الله يجازي اللي خدعنا‎
للجوكر ألف تحية
‎
‎
ملعون خاش الحرية‎
يحيا قانون العبودية‎
‎
و القوانين الوضعية‎
و الحكومات الشمولية‎
‎
لها مني ألف تحية‎
وحِياة أمي دي رجعية‎
‎
و لو صوتنا و جَعجَعنا‎
واحد ولافيش غيره هوه‎
‎
قاعد متربع جوة‎
و بكيفك أو بالقوة‎
‎
لو سوبر مان و فتوة‎
روح قٌله بقى يودعنا‎
‎
عصابات شغل فتوات‎
و استعباط على حركات‎
‎
و السقا أبوه لو مات‎
حيقوم يسقي الشربات‎
‎
و يكمل على مواجعنا‎
مزيكة و تَرَابَاتَّتو‎
‎
و نفديك بالدم.. إفدوه‎
بس إحنا و رحمة أبوه‎
‎
مين ده اللي حَيلوي دراعنا‎
روح هاتلي لمون بالصودا‎
‎
انا حاسة بريحة شوطة‎
حيصعدوا فصل الروضة‎
‎
و الورث حيصبح موضة‎
لم الجدعان و اتبعنا‎
‎
على قهوة ساقية مكي‎
نصرخ نلطم و حنبكي‎
‎
ده ناويها و بيتكتكلي‎
قبل ما حتى يودعنا‎
‎
زقطَطُوا يا عيال قولوا هييه‎
الحكم صبح تيك أواي‎
‎
لو عايز قول أوكيه‎
و لو رافض قول أوكيه‎
‎
في كلا الحالتين نوو واي‏‎
غير كودية و زار ينفعنا‎
‎
لأنا عايزة بخور م الجاوي‎
و حمار أرمل و حصاوي‎
‎
و دراع برغوت مش غاوي‎
تنطيط عفريت و مخاوي‎
‎
شلة مقاطيع يقطعنا‎
حابس من شر الكرسي‎
‎
من شر عزيزة و مرسي‎
من قرص النمل الفارسي‎
‎
م الأحياء و الأموات‎
من كايرو إلى بغداد‎
‎
أشتات أشتوت أشتات‎
حرصوا من لعب السيكا‎
‎
م الحكشة و م البولوتيكا‎
و لا تشمت يومًا فيكا‎
‎
مارشيل بنت أم ماريكا‎
قول حاجة الله يهديكا‎
‎
و ادعي معايا يخليكا‎
حِلُّوا بقى عن أوجاعنا‎
‎
و انصرفوا عليكوا اللعنة‎
انصرفوا عليكوا اللعنة


**************************







البغبغان


آخر بيان للبغبغان اللي ف بلاد العم سام كان بهبهون مافهمناهوش

بعبع وقال بُقين كلام والمعني إيه ماعرفناهوش

معقول يكون البغبغان اللي تبغبغ من زمان صماويل جنابه اتلخلخوا

طول عمره سايق في الجنان والعقل عامل شقلبان قام جاب له أورطة يمغمغوا

عملوا وطن من غير بيبان اتملكوا فيه الغيلان

ووطن جعان ازاي ينام والطمعجية ف خيره ناموا وأنتخوا

والبغبغان يكره يموت يسمع سكوت المخروسين

إن قلت بم قفاك يرن عليه أيادي المحروسين

بيجرجروك أنت وذووك زي الخروف ويسمعوك يادي الكسوف لستة كلام !! ماأبوخه

والبغبغان اللي تبغبغ كل من قرب حداه اتبغبغوا

جوم طرمخوا ع الطرمخان واللي يطرمخ يبسطه وينغنغو

وف مجلس البغابيغ بنلقي البغبغان قاعد يبغبغ بالكلام يضحك وهما يسخسخوا

ماتقلش يعني البغبغان اللي ف بلاد الألعبان هوا اللي كان بيزغزغو

إلهي يهدي البغبغان واللي تبغبغ يوم معاه تقصف رقبته ودغدغو

وإلهي يوم المعمعان ألقاه هناك وكتير معاه م البغابيغ اللي افتروا يوم أو بغوا



ياخلق لأو اللأه قوموا اتلحلحوا

شوفوا الكلاب !! حتي الكلاب لو شافوا يوم واحد حرامي بينبحوا

وانتو اللي مسروق عمركم

وانتوا اللي ضايع حلمكم

ولا حتي يوم تتلحلحوا

ونصيحتي ليكم تروحوا

سبحانه من حكم عليكو البغبغان

تستاهلو ميت مليون كمان

وان شفتم مرة بغابيغ جايين عشان يبغبغوكم

اتبغبغوا

اتبغبغوا[/align]

[align=center]قصيدة ديك دا تور

ايها السادة اللى مش سادة

اليكم نشرة الهم المعادة

فى حديث خاص لاذاعة هس هس العالمية

صرح الوالى المعظم من ولاية ننا ننا

للولاية بتاعنا احنا

اللى عارف كل حاجة

واللى فاهم كل حاجة

والى مش محتاج لحاجة

الا لشوية عزيمة على حبة من ارادة

بس عايزين الصراحة

كان حديثة نيلة خالص

سورى عفوا

كان حديثة حلو خالص

والمذيعة حلوة خالص

والكلام كان حلو خالص

بس كان هايس ولا يص

خدنا فيه الساعتين بطوله

مش لاقى حاجة يقوله

واللى بيقوله يعيده واللى بيعيده يقوله

خلت العثمان بتاعنا عقله خلبت خلطة بيطة

قاله يخرب بيت ابوكى قولى حاجة يا مصيبة

انتى ويانا عليهم ولا وياهم علينا

تنح المذكور وقاله يا بلاوى افهمونى

انا طول عمرى حيادى

اعشق اللون الرمادى

بس فكرى كان ضرورى يكون احادى

زى فكر الى جبونى كان ضرورى يكون احادى

قالع عفوا يا عظمتك يعنى قصدك ديكتاتور

قاله ديك ده اللى قصادك

ولا طور

قاله ديك

قاله يبقى انت اللى طور[/align]

[align=center]

زمن ت*** والكلاب ت***وا

جيش تجيش والذئاب تكالبوا

من كهفهم حكموا البلاد فأسهبوا

وتصدعت أوجاعنا لم يرأبوا

نصف الرجال تزوجوا وتحجبوا

والنصف ينتظر السماح لينجبوا

فتقدمي يا عبل·· مرمى زينب

بشراكم·· بشراكم

هذا دمي فلتعبروا

وتجرعوا

وتعاقروا حتى الثمالة·· أبشروا

ما عاد في قلبي انبعاث

فانثروا ذراته عبر الجحيم

تنفسوا أوجاعه

ثم انفذوا

بين اشتعال الجرح

بين حرائقي

جسر جليدي

ونهر من حريق

فتراقصوا في مرقص الطغيان

واحتلوا المنافذ

والنوافذ

والطريق

إنا على سجادة الدعوات

ننتظر المسافر

والبريد

ونخبئ الصلوات خلف ضلوعنا

ويؤمنا أنصاف آلهة

على أقدامهم تنسل قافلة العبيد

فلتسكتوا جوعى النسور بنطفة من لحمنا

وبجرعة من حلمنا

لا·· لن تثور الثائرة

نحن لها عند المخاض عباقرة

عند الفرار جبابرة

فلتدخلوا كل البلاد الى محيط الدائرة

وتجرعوا دمنا النبيذي المراق

من الفرات··

الى حدود القاهرة
__________________




لنفس الشاعره ايمان البكرى
-----------------------------



فلتقرؤوا هذا الخبر

قبل انعقاد المؤتمر

فأنا الأكاليل·· العذاب

أنا الوجود

أنا الغياب

أنا النبوءة والمطر

نصر على كف الحروف

أنا النوازف والسيوف

أنا الوليد

أنا عمر

أنين سنبلة عوت بكفها

بعث لفجر منتظر

مدن الحصار مدائني

وأنا الدموع الشاخصات

أنا القصيدة والضجر··

وأنا الرمادي الموحد في الرماد

أنا الضياء المشرئب على شواطئ تفتقر

ديك الأساطير محنط

فوق أعلاف السنين

أنا تلال الياسمين

وأنا العجائز والصغار

وأنا بريد الانتظار

تحتل ذاكرتي الرياح

دمي تفقسه الرماح

أنا المباح لكل طاغية عبر



سـلام مربـع





للي ربّع
او مدوّر
للي دوّر
في البلد دي ع الأمانـي
سـلام مربـع للأمانـي
وجمهورية كانـي مانـي
ولنظامها البرلمانـي
سـلام مربـع للكبير اللي استربّع
فوق دماغ مشّش و صدّع
من كـلام عمال بيرسم
دنـيا حلوة فـ الأغانـي
سـلام مربـع للأغانـي



سـلام و داير ع الصوانـي
كـلام و ماشي في ديل كـلام
ولحن تايه في الزحام
غنّى النظام علشان ننام على صوته
نمنا ما قومنا تانـي
سـلام مربـع للي ناموا ماقاموا تانـي
اللي طافوا واللي خافوا
واللي شد عليه لحافُه
وغمّى عينه ع اللي شافه
و راح يقدم للي كمم صوتنا
ولابنه التهانـي
سـلام مربـع للتهانـي



ابن وز وغصب عنا في نيل هوانا
سوا برضانا او المهانه
راح يعوم
ابن حاكم يبقي حاكم
بالوفاق او بالمحاكم
في القانون المستحيل لازم يهون
والوريث يصبح رئيس
بشكل شرعي و فـ ثوانـي
سـلام مربـع للثوانـي




تشريعات على كيف هواهم شرّعوها
وعود قالوها و ضيّعوها
و لعبة بايخة اتعودوها
ناس بترضى وناس بتخضع
ناس مُناها تحب تسمع
يبقى تسمع على مزاج
خطبة تخلق الف مصنع
خطبة تروي و خطبة تشبـع
خطبة تبنـي
فوق رمال الصحرا ألَفات المبانـي
سـلام مربـع للي بانـي


بانـي مجد عشان طموح
مجـروح جمـوح
ظالـم أنانـي
اللي علّى لاجل يعلا
واللي غنّى لاجل يغنا
واللي لما وريده يعطش
يملا بدمانا القنانـي
واللي عمّر واللي دمّر
واللي فكّك واللي سمّر
واللي حزّر واللي فزر
واللي عارض واللي هزّر
واللي شاف الباشا مصلح
واللي شافه وضيع وجانـي
سـلام مربـع للي جانـي


شيء يحزّن
لما صاحب الحق يشحت
لما لون الصدق يبهـت
لما يصبح في البلد دي
الشمال زي اليمين
شيء يحزّن.. شيء يحزّن
لما نرضى و نستكين
و لما يرقص طول السنـين
أراجوز لعيـن
بشكل سافر بهلوانـي
قال هوانـي.. وزاد هوانـي



سـلام مربـّع
للي قال انه هوانـي
وزاد هوانـي
للوعود البهلوانـي
للوريث المعجبانـي
للنظام البرلماني الكاني ماني



سـلام مربـع
للي قطّع واللي ربّع
و اللي مزّع و اللي وزّع
و اللي قلّع و اللي ولّع
و اللي دلّع..
و اللي شخلع في البلد دي
لاجل تبقي
صورة أفظع
للنظام الامريكانـي
سـلام مربـع
للنظام المصر كانـي[/align]

السلام عليكم ورحمة الله وبركاته

موضوع رائع الشاعرة المرأة والانسانه والعاشقه والبنت والام والسيدة الحكم انها داهيه في شعر الاحساس والانسانيه المعذبه التي تتكلم عن نفسها في مصير الآخرين لانها اثبتت بشعرها انها بنت السيد درويش والابنودي وبنت مصر ونساء العرب
فمطالعه لادب الشاعرة يكسبك الثقه في مستقبلنا لان الارض التي تلد كهذة من النساء تلد اكثر حتى تعرفهم

شكرا من القلب للموضوع والقصائد الجميله سبق وان حضرنا عدد من اللقاءات الشخصيه للشاعرة وعلى الكثسر من الشاشات العربيه المثقفه
تقبل سلامي

.




قصائد رائعة لشاعرة رائعة مرهفة الإحساس مع نبض الشارع

الشكر والتقدير لك عمو أحمد


مع محبتيlonely

لم اكن اعلم حقا من هى ايمان بكرى ؟ ولم اكن اسمع عنها . لذلك اشكرك كثيرا أخى فى الله انك عرفتنى بانسانة جميلة ذات احساس عالى وقلب نابض بمحبة وطنها وتملك شجاعة كبيرة فى ان تنتقد عيوب بلدها وذلك قصدا لمصلحة بلدها

الف شكر للمجهود العظيم

شخصيات نادرة المفروض نحافظ عليها...... شكرا

المشاركة الأصلية كتبت بواسطة شمس الحياة لم اكن اعلم حقا من هى ايمان بكرى ؟ ولم اكن اسمع عنها . لذلك اشكرك كثيرا أخى فى الله انك عرفتنى بانسانة جميلة ذات احساس عالى وقلب نابض بمحبة وطنها وتملك شجاعة كبيرة فى ان تنتقد عيوب بلدها وذلك قصدا لمصلحة بلدها

اشكر لك مرورك
ويمكنك بالبحث عن الشبكة العنقودية
ان تحصلى على الكثير من اشعارها

المشاركة الأصلية كتبت بواسطة alsaba الف شكر للمجهود العظيم

شاكر لك مرورك

المشاركة الأصلية كتبت بواسطة khaled.s شخصيات نادرة المفروض نحافظ عليها...... شكرا

شاكر لك مرورك