إخوتي الكرام ... أخواتي الكريمات
اليكم هذا الحوار
وأتمنى أن يعجبكم

[c]في مرة قالت جدتي
الحب دي الأيام حرام
الحب يابن الناس مصالح
الحب قصة من الأوهام
الحب بحره غويط يغرَّق
الحب حلم من الأحلام
جاوبت ايه ياجدتي !!!
كان فين كلامك من زمان
لما هويتي ياجدتي
وعشتي في الحب اللي كان
بينك وبين جدي حكاية
حكاية ولا أحلى حكاية
يوم ماتقابلتوا من زمان
وشربتوا من بعض الحنان
وبنيتوا قصر من المحبة
وزرعتوا في الأركان موده
وعشتوا تبنوا في قصركم
وفضلتوا عايشين في الأمان
والنهاردة بتقوليلي
الحب دي الأيام حرام
عايزاني اصدق كلمتك
وأنا الدليل على قصتك
أنا الحقيقة بين أيديكي
أنا النتيجة من الغرام
ردت وقالت جدتي
افهمني في اللي باقصده
الحب كان أيامنا حب
حب النهارده بنفقده
حب كان غرضه شريف
حب م القلب النظيف
حب يبني مش بيهدم
حب أيامنا عفيف
والنهارده يابني انتم
غلبانين في الدنيا ديه
دنيا دوامه وانتم
حيرانين وانتوا الضحية
الحب فيها للفلوس
إن كان معاك ياألف أهلا
وان كنت خالي ولا حتى سهلا
ياميت خسارة ع النفوس
شوفت ايه الفرق يابني
والا تاني ح تعارضني
قول بإيه إزاي أفرق بين
جنسكوا وجنس التيوس
***
قلت ماشي ياجدتي
افترض صحة كلامك
وان أيامنا ف زمانا
بتختلف وايام زمانك
بس كل زمان له ميزة
حاجه حلوة أو لذيذة
زمانكوا كان هادي ورايق
والكل فيه صاحي وفايق
والكل ماشي بالهداوة
وهيه دي والله الحقايق
أما زمانا زمان سريع
التكنولوجيا شيء بديع
قربت بين القلوب
والبشر أصبح جميع
ضحكت عليه جدتي
وقالت ياخوفي يانكبتي
م التكنولوجيا اللي بسببها
البشر اصبح قطيع
ده بيكدب ع الجيران
والتاني بيهد الحيطان
واللي يلعب بالصبايا
واللي عايش في الغواية
والطيبة مابين الرحاية
مقفوله في وشوشها البيبان
يبقى فين الحب يابني
والا تاني ح تعارضني
دا الحب كان أيام زمان
***
عاشق الورد
[/c]

زهرة الشرق