احسبها صح .. تعيشها صح
بتطالعنا الحكومه المصريه الجامده جدا جدا كل يوم بالاعلان الفظيع ده
ان الشاب المصري لما يحسبها صح حيعيشها صح
بمعني ان الشاب المصري لو بطل ياكل سمك وفراخ دليفري
وعمل عجه بايده
حيقدر يتجوز ويجيب شبكه ويفتح بيت ويقنع اهل العروسه
وكل ده في ظرف كام شهر
يا بلاااااااااااااااااااااش والله
ده بينقلنا لنقطه خطيره بت فظيعه
اما ان الشباب المصري ابن ال ...... المحروسه اللي عايش لا شغله ولا مشغله ولا جواز ولا دراسه ومخلص تجنيد في الجيش
( حياه العربده والصياعه الابديه من الاخر )
اللي هما عباره عن واحد وتلاتين مليون اللهم صلي عالنبي شباب متخلف عقليا كله
ومخدش باله من فكره الجنيس الرهيب اللي مجبتوش ولاده موظف الحكومه اللي اخترع الاختراع ده
او ان الحكومه محدوفه عالاخر وعايشه في الكماننا خالص وضاربه حبايتين انتي بيوتك الف وحاسه ان تمن الشبكه وتكاليف الفرح هو عزومه سمك
لا بقي مبدهاش لا مؤاخذه.. نناقش ونشوف النصيبه السوده دي
كنا ناقصين
زمان الشعب المصري الطيب قال
(الشاطره تغزل برجل حمار )
طب ادي الشعب المصري في اخر خمسه وعشرين سنه
غزل برجل حمار
ولبس هدوم كمان من الغزل ده
واخيرا أكل رجل الحمار اخيرا في القضيه الشهيره
يبقي اذا الشعب عامل اللي عليه واللي جمبه واللي تحتيه كمان
انا اصلا اظن ان الشاب الروش نابليون بونابرت قال مقولته
(مفيش مستحيل)
لما سالوه ازاي الشعب المصري عايش ؟؟
المهم يا معلم ان ده مش الاعلان اللي يحرق الدم
تؤ تؤ التقيل ورا استني
اللي يحرق دم سعادتك اعلان مدينتي اللي بيجي بعديه علطول في ديله
الفيلا بسته مليون بس
وتلاقي شاب وسيم جدا متجوز واحده زي القمر ومعاهم عيال اتنين فولت كمان وحينوروا
مثال جامد للاسره المصريه
وكمان لما الاولاد بيركوا الباص بتاع المدينه بيبقي في اوبشن القفز الحر لمسافه عشره متر من الباص وده غير متاح في اتوبيسات القاهره العامه
والراجل تلاقيه عنده اجتماع في ناطحه سحاب وتلاقيه ماسك شنطته وخارج من هليكوبتره بكل شياكه نظرا لان العربيه الهامر الاتش ثري بقت لوكل وبيئه بالنسبه لعليه قوم الشعب المصري يعني تقدر تقول عربيه لادا
وتلاقي الست بكل براءه ونضافه وشياكه واناقه وجمال
بتنسق زهور حديقتها
كل ده وانت بتتفرج علي الاعلان وبتعمل حاجه من الاتنين
يا بتاكل عجه عشان تبقي زي الناس دي تبعا للحمله القوميه للارتقاء بالعجه
(صنيه لكل مواطن)
يا اما عمال تحسد وتقر لحد ما هشام طلعت مصطفي دخل السجن في قضيه شرف هههههههههه
ولو كنت من اصحاب القلوب الرحيمه الناس اللي لا بتحسد ولا بتحقد
لما حتشوف اعلان مدينتي (وهي ولا مدينتك ولا عمر اهلك حتشوفها) حتضطر تدعي وتقول ربنا يفك سجنك يا اتش (هشام طلعت مصطفي)
في كل الحالات حيؤدي ده لتلت حاجات كنتيجه قهريه
اما انك مواطن رخم ومش حتتأثر ودي قلما حتحصل لان الليله دي معموله علي ايد خبراء علي اساس انها تحرق دم اي حمار
او انك شاب حتاخده الحميه .. حميه الجاهليه الاولي
وتطلع في مظاهره تبع حركه (بس بقي قرفتونا)
وحياكلوك عجه انما ايه .. عجب
او انك تعمل زي العبد لله اخوك و تتبني النظام الامريكي في معالجه مرحله ما بعد الكارثه وتتوجه بكل هدوء ورزانه لاقرب صيدليه وتبدا بتكوين احتياطي ضخم من برشام الضغط يوازي احتياطي فورت نوكس الامريكي
علي فكره الخطه بتاعتي مش لازم برشام ضغط بس بالعكس
الافضل لكنه الاصعب
و الحل الجذري اللي بيجيب من الاخر
انك تديها يا معلم حقنه هوا فاضيه وبالشفا