بسم الله الرحمن الرحيم
اليوم وبناء على الرسايل والايميلات والموبايلات والاتصال المرئي والغير مرئي وعن طريق البلوتوث وال اس ام اس وعن طريق الطلبات التلفزيونيه والاذاعيه العربية والاوربية والكنديه
اللي طلبت مني عمل السماقية الغزاوية
اللي فاكره كلو انه هيفاء طلبتها .. من فين طلعوا اللي فوق
ماعلينا طبعا كل بيت الو طريقته وكل ام غزاويه الها طريقه بعمل السماقيه وطبعا فيه بعملوها حمرا وسودا وبنيه وبتفننوا فيها وطبعا هاي اكلة فلسطينيه بحته ومشهوره جدا في فلسطين وبتنعمل في المناسبات غالبا ..
خلينا اول شي نكتب المقادير ..
نحتاج سماق ولحمه وحمص حب وثوم وعين جراده وبصل وفلفل اسود وملح وسلق وطحين وطحينة وفلفل اخضر ( هااااااا لا اوصيكم في الفلفل ) وزيت
طبعا كل المقادير الها كميات حسب كل شخص كم ناوي يعمل ..
والسماقيه غالبا مابتنعمل لغدوه والسلام ..
جرت العاده انه البيت اللي بعمل السماقيه بعمل كميه كبيره ويللا توزيع للجيران والاقارب .. كل واحد بياخد صحن والضيف اللي بيجي بيوم السماقيه كمان الو نصيب فيها وبتقدملو صحن سماقيه مع عيش مع فلفل اخضر وصحن فلفل احمر وزتون ههههههه وجبه ميه ميه
الطريقه
اول شي نحط بالطنجرة الزيت ونفرم البصل والثوم ونحطهم فوق الزيت ونقلبهم
وبعد هيك نحط اللحمه وتكون قطع صغيره والحمص المنقوع والفلفل الاخضر والاسود وعين الجراده والملح
الفلفل الاخضر حسب الرغبه .. بس حلاوة السماقيه لما تكون بتحرق .. وهاي شي حقيقي مو مزح ههههههه
المهم نخلطهم مع بعض ونقلبهم شويه
ونفرم حزمة سماق ونحطها في الطنجرة ونقلبهم طبعا لو احتجتو شوية ماي حطو عليها ماي وكمان لاتنسو تسلقوا السماق لمدة عشره دقايق قبل ماتحطوها في الطنجرة وتحطو مية السماق كمان في الطنجره
بس المهم تقعدوا تقلبوا بالطنجرة باستمرار وتحطوا في الطنجرة طحين ذايب في ميه بارده وترشوا على الطنجرة وانتوا بتحركوا فيها ياستمرار واول ماتلاقوا اللي في الطنجرة بدا يتماسك بتحطوا شوية طحينه عليها وبتحركوا باستمرار
وبس كده انتهينا من السماقيه اول ماتشوفوها صارت ماسكه ..
تحطوها في صحون وتسيبوها تبرد براحتها
هلا يبدا دور النفسيات ...
يعني صحن سماقيه مع صحن زتون اخضر مدقوق من ستي ام وليد وصحن فلفل احمر وقرنين فلفل اخضر ومافي مانع لو كان فيه طراشي جنبهم .. ولاتنسوا الخبز الله يخليكم
وربي وربي .. اكله عن مليون اكله لكن الشاطر اللي يلاقي احد يزبط السماقيه لانها لو مازبطت مابتطلع زاكيه
يعني من الاخر ... مابعملها اللا المعلمييييييييييييييييين
ورقصني ياجدع على حبه ونص
وصحتين وعافيه على ئلوبكم