قمر خـــالد (قصة راااااائعة)

يقعد عند قمر ويهديها: يه... وصيتها؟
مريم : شتسوي عندكم؟؟ظ ووين لقيتوها
قمر بتقطع: بيوم رحتها... كتبتها.. عطتني اياها.. انا ماذكرت ... الا الحين... مريم انا نسيت هالرسالة.. نسيتها تخيلي... يالله... اهي تقول فجوها بعد سنة.. وصار لها ثلاث سنييين.. يالله .. كيف بسامح نفسي
خالد: حبيبتي انتي مو غلطانة.. انتي كنتي في زحمة اشياء كثيرة لا تلومين نفسج تكفين..
قمر واهي تحظن خالد: ياربي..
مريم واهي تبجي:... وينه خليل.؟؟؟
خالد: اكيد في المسيد. الحين بيرجع
مريم راحت عنهم
خالد: وين رايحه
مريم: .. خلوين بروحي معاه... مثل ما ردني . بيوم لسعود.. انا اليوم.. برده للدنيا...
خالد مافهم على مريم ولكن راحت عنه واهو ظل ويا قمر اللي كانت تبجي .. تبجي فراق وضحة للمرة الالف.. اااه ياوضحة كيف بتسامحيني ؟؟ كيف استسمح منج انا.. كيف.. ؟؟ وانا اللي نسيت وصيتج لي.. اسامحيني يالغالية سامحيني...
مريم كانت قاعدة في الغرفة يوم وصل خليل
خليل: خاطري ماشوفج بداري.. يعلج مرتي ولا ادري .. انتي ريلج امهيمج يعني؟؟ شسالفتج؟؟؟
مريم تناظر خليل بكل شفقه وبكل حب ..
خليل: شفيج؟؟ ليش تطالعيني جذي؟؟
مريم: خليل.. تعال هني شوي الله يخليك..
خليل قعد يمها:.. شفيج مريم شتشكين منه؟
مريم:... خليل.. انت تحب نورة؟؟
خليل استغرب من مريم: هالسءال مريم؟؟؟
مريم: تحبها ولا لاء.. جاوبني الله يخليك..
خليل بعد عيونه عنها:... هذا سؤال ماقدر اجاوبج عليه
مريم: ليش؟؟؟؟؟
خليل قام عنها:.. بس .. ماقدر اجاوبج..
مريم تقوم وراه: خليل.. انا عندي لك شي
خليل: شنو
مدت مريم يدها لخليل اللي التفت لها وشاف الورقه بيدها: شنو هذا
مريم: فجه وبتعرف
سحب خليل الورقه من يد مريم واهو مستغرب من غموض اخته.. والحين تبجي؟؟ علامها مريم
فج خليل الورقة وبدى يقراها..
وملامحه
تتبدل بتبدل الجوووو
يوم شاف الورقه كان عاقد حواجبه.. ويوم تمعن فيها.. لانت ملامحه
ويوم كملها.. سالت الدمعه..
يا ترى شمكتوب في هالرساله...
اللي مكتوب كان

( بسم الله الرحمن الرحيم)
( قمر.. فجي الرساله بعد سنة من عمر العيال... تكفين.. لا تنسين تراها مهمه .. لهم.. ولبوهم)
(( الغالييين.. انا ادري بفراقي عنكم .. راح تتاذون.. وادري اني ببعادي. راح اعذب الكثيرين.. واولهم.. زوجي وحبيب حياتي.. خليل..
قمر.. انا ادري .. ان عيالي معاج ومع زوجج ومع عمي وعمتي ومريم وجاسم والكل.. ما راح ايضيعون ولا راح يحسوون بالفراغ.. لانكم تسدون وتكفون.. اتمنى من كل قلبي انكم تربون عيالي على مبادء الصح.. وتكبرونهم على الفضيله وحسن الاعمال.. الانسان ماله في هالدنيا الا الاعمال اللي بها يوسع اخرته ولا يضيقها..
لكن.. انا خوفي على زوجي.. خوفي علىخليل..
لا تخلونه يا قمر..
طلبووو منه .. وخلوه.. يتزوج من بعدي
خليل يا قمر انسان حساس ومرهف.. خليل مايشكي وحدته ولا يشكي همومه لاحد.. خليل همومه لنفسه وبس.. لا تخلونه يتحمل هالوحده لحاله ما راح يقدر.. وخصوصا مع عيالي وياه.. لا تخلونه لحاله
طلبو منه انه يفرح.. يفرح ويفرح كل ماقدر.. وان كان هالفرح بوحده غيري.. فهذا الشي عمره ما راح ياثر علي ولا على ذكراي في قلبه
قمر.. اوصيح في خليل.. انتي ومريم... تراه وصيتي على الدنيا من بعد الموت.. خليل اهو حياتي.. هنوه عشان اهنى انا في اخرتي...
خبرووه اني احبه.. واني اسفه لاني بروح.. بس.. كل من دنا يومه.. رحل...
هالله هالله في عمي وفي عمتي..

ياريتني قدرت اعيش اكثر... ياريتني
وضحه ))

خليل يوم انتهى من قراءة القصه بقووووو عصرها بيده وتعصرت ملامحه معه.. يالله.. وضحة شقاعده تسوي فيني.. شهالرسالة.. وين كانت هالرسالة..
خليل يلتفت لمريم: من وين هالرسالة؟
مريم واهي تبجي على صدمة اخوها: كانت عند قمر وضحة عطتها اياها.. بيوم وفاتها.. وقالت لها ما تفتحينها الا بالتاريخ؟
خليل بعصبيه رد للورقه يشوف ان كان لها تاريخ بس ما شاف الا هالعبارة تحت البسملة..
( قمر.. فجي الرساله بعد سنة من عمر العيال... تكفين.. لا تنسين تراها مهمه .. لهم.. ولبوهم)

خليل بغضب: تعرفون عن هالورقة من .. من سنة العيال وانتو ما خبرتوني
مريم: لا خليل.. قمر نست هالورقة من بعد ما عطتها اياها وضحة والظروف ما ساعدتها انها تذكرها..
الا وقمر تدخل الغرفة ويا خالد .. وكان شكلها ماساوي.. مسرع ما تنفخن عيونها من البكى.. وخليل بس شافها ناشدها بعيونه
خليل: قمر.؟ قمر... انتي عندج شي لوضحة وما خبرتيي عنه؟؟
قمر حست بالذنب الفضيع يكتسحها:.. انا نسيت.. مادريت..
خليل وهو يفكر مكانه.. يحس باللووووووووعه تتقلب بجسمه من مكان لثاني.. يالله شهالصدف.. الحين وانا في غمرة توتري بحبي لنورة او... او رغبتي في نورة تجيني هالرسالة وكانها منزلة من الله.. يالله صحيح انك تمهل ولا تهمل.. تمهل ولا تهمل..
قمر: انا اسفة خليل
خليل ما التفت لقمر لان ماكو شي يسامح قمر عليه.. لكن بعد قمر ردت وقالت واهي ميته بحظن خالد
قمر: سامحني يخوي.. ماكنت ادري... نسيت
التفت لها خليل وصدمهتهم دموعه اللي كانت تهل وابتسامة عامرة ويهه:.. ماكو شي اسامحج عليه قمر.. لاني انا بعد هممم مشترك وياج.. لا تنسين انا اللي يبت هالورقة لوضحة عشان تكتب فيها.. ههههه للحين اذكر.. رحت لهم في الريسيبشن( يتلفت للكل ) وقلت لهم هاتو لي ورقه.. النرس تقول لي ما عندنا اوراق جان اسحب هالورقه اللي في دفترها ( ياشر على الوصيه واهو يعصر عيونه اللي تهطل امطار الدمووع المالحة) ويبتها لوضحة عشان تكتب...
التف عنهم خليل واهو يلم الورقة بكل وجع.. يلمها لبطنه وكانها اهي الدوى او اهي اللي بتشيل هالالم منه..
خليل: ريحة وضحة.. .. آآآآه يا وضحة.. آآآآه يا وضحة...
سكتت انت خليل لكن كانو يدرون انه يبجي.. بهذي اللحظة ركب جاسم لهم واهو يبتسم..
جاسم: او او كلهم امعسكرين هني..
التفتو له الكل والدموع مغرقة عيونهم.. جاسم خاف بهذيج اللحظه
جاسم: شصاير فيكم؟؟؟؟ ليش تبجين يا مريم..
مريم راحت لعمها ووبحظنه غابت وجاسم خاف زود
جاسم: خالد علامكم؟؟؟ شفيها مريم.. ( يشوف قمر ويلاحظ شكلها الحزين) وهذي بعد... صاير شي وما قلتووو لي ايااه؟؟
خالد يمد يده يمسك كتف جاسم مهدئا لروعته: لا ماكو شي.. بس.. اكتشفنا ان اكو رساله من وضحة لخليل.. ولنا.. وصيه يا جاسم.. وصيه لوضحة؟
جاسم بصدمة: وين لقيتوها؟
خالد واهو يلم قمر لصدره: عند قمر كانت... ونسيناها...
جاسم يهدي مريم اللي زادت وتيرة بجاها.. وهدئها: اوش يا مريم .. بس حبيبي ما صار شي.. سكتي شوي...
هزت راسها مريم مطاوعه لعمها وكانها ياهل مو حرمه ام عيال.. وراح جاسم لخليل اللي راح عند الدريشة يد تلم الرسالة والثانيه مسندها على فريم الدريشة.. يالله قلبه مليااااااااااااان حب وشغف وحزن وشووووووق اااه منك يا شوووووق صحيح اللي قال عنك انك طويل..
راح جاسم لخليل : خليل.. شمكتوب في هالورقة..
لكن خليل ما رد عليه وعطاه الورقه من وى ظهره.. خذها جاسم وقراها... وتعجب من المكتوب فيها... يالله عليج يا وضحة.. بدل ما توصي بعيالها وصت بخليل... وصت بخليل لانها عارفة انا لعيال ما راح ايضيعون.. حتى واهي ميتة .. حتى واهي بتفارج الدنيا والواحد ينشغل هذاك الوقت بنفسه.. كانت مآآثرة خليل عليها.. ياويل قلبك يا خليل.. وش اللي مطلع هالرسالة بهالوقت... ايش؟؟؟
خليل كان يمسح الدمعه الساكبه الي ما سكبت من عينه الا بوفاه وضحة قبل 3 سنين.. واليوم كاهي ترررد لعينه وتوجع قلبه تنزف من مصب الدم ... اااه يا وضحة.. اااه..
عيونه كانت على الحوش اللي بره.. يحس ان هناك اكو حركه بين الناس.. الا وشاف سيارة جيب لكزس رماديه.. عرفها وكانها حقت ناصر... تم يوايق باهتمام ولكن ملامحه ما تدل على هالشي.. الا وبنتين يمشين ناحية السيارة وهن متغطيات... ركبن السيارة الا وحده في الكرسي الوراني.. وقفت لان ولده ابراهيم سحب عباتها وطيح غشوتها واهي نزلت له...
نـــورة ما غيرها..
كانت تتكلم معاه واهي قاعده على الارض.. تبتسم له وكانها توصيه.. واهو يهز راسه واهي تعدل له ياقه الدشدااشه اللي عليه.. تمسح على راسه بحناااااااااان.. خلت خليل يتمنى لو هاليد تنمسح على راسه اهووو لانه محتااج لها اكثر من ابراهيم...
واهي توصي كانت تاشر براسها لغرفة خليل.. لان نورة كانت تعرف انها فوق بمواجهه الباب الرئيسي للبيت.. ويوم فرت راسها لاحظت اللي واقف... واقف وماد يده مسند جسمه المايل على الدريشة ويناظرها.. فز قلبها من منظر خليل اللي كان ... وانشلت عظامة جسمها انها تتحرك.. لكنها باست ابراهيم وعيونها على اللي بالدريشة يناظرها.. تمت تمشي للسيارة وتفتحها وعيونها ما تفارق خليل.. اااه منك يا خل هالروح والقلب.. عيني كيف اصبحت شقيه ما تفارق عيونك.. مادري ليش .. احس ان نظرتك هذي.. اهي النجاه لي في هالدنيا من كل شي...
وخليل الثاني مافارقت عيونه الجاسرة عيون نورة متعلقه فيها ومتشبثه.. وقبل لا تدخل نورة السيارة ارسلت السهم اللي انطوى في صدره.. ابتسامة مثل اللحاااااف الحريري ليمن يهب ويطيح على جسم احد.. ويعطيه احساس النعومة والكررر في البدن.. وكان باطراف خليل كلها متجمده من هالابتسامة الحلوة اللي بكل معنى ترد الروح للواحد... ومنها.. غابت نورة عنه ففي السيارة المخفي.. ليمن ابتعدت وابتعدت الى بره حوش القصر.. والى بره البيت.. وبره الجهرا.. وبره بعيد.. لكن وين.. قريبه من قلبه اكثر من حبل الوريد...
^^^^^^^^

في يوم الجمعه بعد اسبوووع من اكتشاف الرسالة.. كان خليل قاعد ويا امه من بعد الغدى.. كانت امه حاطه الوليد اللي هو مدلل اليده نيمه من بعد ماكان ابوووه اهو مدلل نيمه واهي تدلله
خليل: خلج عنه يمه والله حرام شوفي شصار بسبتج دراااام
ام خليل: فديت عمره والله هذول اليهال السنع موووو واحد عصقول ما ينعرف الجلد من اللحم..
خليل: ههههههههههههه لكن الوليد ظاهره غريبة في اليهال
ام خليل: قول لا اله الا الله..
خليل: شكووو عيوني حارة يعني ههههههههه
ام خليل: قول وبس..
خليل واهو يمسح على بطن الوليد اللي تفدع ابحظن ام خليل:.. لا الـــــه الا اللــــــــــــه لا الـــــه الا اللــــــــــــه لا الـــــه الا اللــــــــــــه
والوليد يضحك: عموووووووووووه بتني..
خليل: بتنك.. قول ان الله يعلللللللك الفدعة طول عمرك قول امين
يرفع الوليد يدينه بالدعاء : آآآآمــــــــيــــــن
ام خليل: حبيبي روح لامــك في المطبــخ هلا تييب لنا الشاهي والكيك..
خليل: لا يمةةةةةة شكيكه بعد والله هالياهل متوهق معاكم.. حبيبي روح لابراهيم والعنود.. شوفه اكيد امدلع الجازي ويطقك انت
الوليد: اسلا بعتيه بوووكس .. اسوهه ( اشوهه)
خليل: ههههههههههههههههههههههههههه لا لا انا اشهد ببكسك انه يشوه
الوليد : هاك عمييييييي
ويضرب الوليد خليل على بطنه بضربه ما تاثر ابدا وخليل يمثل: آخ آخ خلاص انا ميت لا محالة... ميييت .. اصبر علي .. يا ترح للعنوووود لا والله اذبحك..
الوليد يركض على الدري واهو يضحك: ما بتسييييدني.. ما بتسيييدني
ام خليل تضحك وخليل بعد والوليد راح عنهم..
ام خليل: يالله.. الحمد لله يومنكم فرحتوني بعيالكم.. والله ان البيت كان خالي بلياااهم
خليل: وين فاضي يمه شوفي الكراسي المحذفه والفخار ولا هالديكورات.. انا اللي مستغربنه ان للحين ما انكسر شي منهم وكل هالعيال عندنا
ام خليل: يعني تبيهم ينكسرن.. ناسي انهم غلايا.. ومعظمهم مو من الكويت..
خليل: عاد يالله الحين.. الا فلس واحد ما يسووون..
ام خليل: يالله عاد ما مسكت الا هالفخار الحين يطيحون وينكسرون من عيونك
خليل بلهجه نسائيه: مـــــلح وشــب وعـــود في عيـــن كل حســـود اللــي ما يــصلي عــلى النبـــــي
ام خليل: هههههههههههههههههههههههههههههه مالت عليك للحينك خبل...
خليل واهو يلوي على امه: فديييييييييييت هالويه اللي هو مخبلني.. ياحبيلك يا ماما..
ام خليل: فديت عمرك والله ياوليدي..
خليل: حلاته خالد هني عشان يحترررر..ههههههههههه
ام خليل: مو لله لامني عشان تقهر اخوك.. قوم اقووول قوووم.. روح شوف مريت اخوووك شفيها ..
خليل: ان شالله..
قموووووووووووور .. قوووووووووومر
قمر اللي في المطبخ ويا خالد الي هو معطلنها.. الا بوسه والا لمه.. والا تعالي هني والا ما تطلعين.. خليج خليج
قمر: خالد والله حرام عليك يدخل اخوك الحين ويشوفنا جذي
خالد كان ماسك قمر من خصرها ولامها بالقو مووو طايع يتركها.. : كيفي حلالي يشوفج خالي ان شالله الكون كله.. انا مالي شغل..
قمر شوي وبتصيح: يعني انت متى بتثقل .. والله حرام انا اعاني وياااااك.. حرام..
الا وخليل يتحمحم: احم احم اللي لام حرمته واللي حاظنها واللي قاعد يتغزل بها يفجها الشيخ خليل بيدخل..
(ويدخل خليل واهو مسكر عيونه ) خلاض انا دخلت خلاص خلاص عندكم ثانتيني تفجوون عن بعض خلاص بفج عيوني بفجهن بفجهن..
شوي شوي خليل يفج عيونه يشوف قمر في صوب وخالد المنقهر في صوب ثاني.. ويضحك
خليل: ههههههههههههههههههههههههههههههههههههههههه مسكين خالد... مرة ثانيه..نتيجة المباراة.. واحد لقمر .. وصفر لخالد.. هار لك يا خالد..
خالد: شتبي انت؟
خليل: لا تخاف مابيك.. واللي يشوف ويهك يتمناك.. اقووول اطلع بره عندي كلمتين على بعض خفايف للقمر مرتك..
خالد: وشالسالفة اللي عندك اياها ويا مرتي..
خليل: ياخي اختي وكيفي..... لا يكون بس اهي صفتها انها مرتك وبس في هالبيت.. تراها بنت امي وابوي.. واختي.. وعمه اليهال.. وام الوليد...
خالد: قول اللي تبيه جداااامي... ماطلع انا..
خليل: قمر شوفيه
قمر: قول ياخوي ولا تحط في بالك.. ولا كانه موجود..
تغمز لخالد:: أي معليه معليه يا قمر.. معليه..
خليل : هههههههههههههههه يا كررررررهك غييووور جذي ليش باكل حرمتك انا.. تراها عادي تنوكل احسن من تغص بالبلعوون
قمر: ههههههههههههههههههه لا عاد بس .. مارضى عليه ( بحيا)
خالد يطالعها بنظرة كلها حب من غير ابتسامة وكانه يتكبر عليها ..
خليل:.. زين قمر.. الحين وقتج..
قمر: متاكد؟؟ ما تبي تتاكد اكثر
خليل: لا الحمد لله انا استخرت ربي ووايد عجبني الشي..وارتحت وحلمت والحمد لله .. يالله قوليلها قمررر( بحماس)
قمر: واهي تحمل الصينيه: ان شالله .. ولا يهمك
خالد: هاتي الصينيه عنج..
قمر: لا بس امسك هالدلة و.. خليل انت ييب الكيك
خالد: هاتي الصينيه وخليل يحمل الدله والكيك... بس.. شالسالفه..
خليل: مافي.. لا تقوليله..
خالد: افا الحين انا ما تقولولي؟؟ افاا والله افااااا... هزلت..
قمر: اقوللك حبيبي لا تخاف.. هههههههههههههههه
وراحت قمر الصاله لام خليل واهي حاملة الاغراض.. وخليل معاها وخالد..
ام خليل :ألى العصابة كلها ويا بعض.. ربي ما يفرق امبينكم..
خليل يازعم انه تعنيه اهو وقمر: .. الله يخليج يا يمه.. ما شاءالله التفاهم سادي بيناتنا.. مو قمر
الثانيه انحرجت من خليل وخالد: هي هي تقصدني انا وهي..
ام خليل: اقصدكم كلكم.... ههههههه يالله قعدووو شربو شاهي
خالد: وينه ابوووي؟
ام خليل: في مكتبه اكيد..
خالد: اروح انادي يشرب شاهي..
خليل: لااااااااا خله بروحه ..
خالد: ليش زين اهو يحب الشاهي
ام خليل: لا خله اهو راسه منصدع.. وقاعد هناك اكيد يستريح
خالد قعد بعد ما عطاه خليل نظررررة اجرامية انه ما ينعطى ويه.. وخالد حس ان الموضوع كايد اللي ما يبي خليل ابوووي يدري عنه.. ياترى شنو؟؟
الا قمرواهي تصب القهوة لام خليل: الا اقول يمه
ام خليل: سمي يا بنتي
قمر: سم الله عدوووج.. يمه شرايج في نورة بنت خالتي .. انيسة؟؟
واهي تنقل نظرها بين خالد وخليل اللي كان متحقرص واهو يمصر في صوابعه بين ايديه.. وبيضهن من زووود الضغط..
ام خليل: خوش بنت.. والله انا ما شفت بنت مثلها.. حشيم واخلاق ورزينه.. والله تستاهل كل الخير..
قمر:.. زين يمة... شرايج لوو؟؟؟
تطالع خليل واهي مرتبكة والثاني ياشر لها تاخذ نفس وشوي شوي لا تتوتر..
ام خليل: شفيك انت تاشر لمرت اخوك
خليل فج عيونه: ها... لا ولا شي.. بس... ( يطالع قمر..) على راحتكن
ام خليل تمسك يد قمر:.. علامج يمه فيج شي...
قمر: يمه .. شرايج نزوج... خلليل... ونورة بنت خالتي؟؟
ام خليل انصدمت من اللي قالته قمر:... نورة؟؟ لمنو؟؟؟
قمر حست بالارتباك؟؟ يا بي انا شقلت؟؟
ام خليل: عيدي قمر... ( تلتفت لخليل) نورة.. لك انت؟؟
خليل هز راسه بكل سرعة واهو متوتر وخالد مستغرب اكثر منه متوتر..
ام خليل تهلل ويهه: هــــــــــــــاذي الســـاعة المباركة يا وليدي... بس.. انت متاكد؟؟؟ انك تبي تتزوج؟؟
خليل ابتسم لامه: أي يمه.. متاكد.. انا استخرت... وتاكدت.. وو..... ايه
ام خليل: يا خليل تاكد يايمه.. ترى البنت مو لعبة...
خليل: يمه افا انا الحين قايل لج مو متاكد.. خلاص يمه انا متاكد وهاندرد برسنت شور؟
ام خليل: هااا
خالد: 100% متاكد.. ها يمه شقولج
ام خليل تبتسم ومو عارفة شلون تقعد مكانها..: يا ولدي مالي شووور.. انا ودي اليوم قبل باجر. والله ان البنت كانت في خاطري.. بس الحين.. اااااه صج انك بردت قلبي يا خليل... يا جعلني فدوة لك يا ولدي
واهي تلم خليل وخالد: ها ها يمه انا هني
ام خلليل: يا بعد عمري يا خالد.. انت عندك مرتك كاهي لا تغيضها..
خالد: لا انتي غير واهي غير
قمر تلكزه بيدها الخفيفه
خالد: ههههههههههههههههههه
خليل: ها يمه.. شقولج؟؟ على بركة الله؟
ام خليل واهي تبتسم لولدها والدمعة في عوينها:... الله يطرح البركة..
خليل وقف مكانه واهو متحمس... كان رافع اكمام الدشداشه واهو متونس بالحيل.. ياربي.. يااااربي شهالفرحة.. حس انه رد شباب.. رد شباااااب من اول وجديد.. قبل يوم تزوج وضحة.. ويوم شافها.. ويوم حبها.. ياللللللللللللللللله .. يالله...
شال بعمره خليل وراح فوق داره
خالد: وين رايح هههههههههههههههه
خليل: اروح البس عشان اليوم انروووح لهم.. اليوم ما نعطل.. اليوووووووم يمه
ام خليل: ههههههههههههههههههههه خلنا قبل نتصل فيهم ونطلب منهم يوم ما يصير جذي على بعضه
خليل وقف على الدري بصدمه: كاهو جاسم خطب لولوة من غير ما يتصل ولا غيره ولااا ملج عليها..
ام خليل: وفضحنا بين الناس.. للحين ام شبيب تقول لي صج اللي سواه جاسم ..وصج اللي سواه.. لا .. انا اتصل في حرمت عمك اخذ الرقم من عندهم واستاذن منهم منقود اللي سواه جاسم وانت اكبر منه خل عقلك في راسك
خالد: ايه واحنا عرب مو انجليز نطب على الناس جذي... اصبر على خير ربك..
خليل: مافيني صبر يانااااااااااس.. روحووو خطبووها..
ام خليل: خليل؟؟؟
خليل بهدوء: زين زين.. اتصلي فيهم وقوليلهم باجر
ام خليل: لا.. خلها يوم الاثنين.. من بعد مافطر انرووح لهم.. لا تنسى رمضان جريب.. اكيد يصومون الاثنين والخميس..
خليل واهو يمسك راسه بقله صبر: يا قلبي يا قهري يمه عادي واله عادي اشفيج انتي
ام خلي بعصبيه: خليل... علامك راد لي ياهل.. يالله قلتلك يوم الاثنين وخلاص
خليل: يعني ماكوو أي تعيررررر
ام خليل: هذا اذا كان يناسبهم
خليل: يمــــــــه لا تييبينلي جلطه..
ام خليل واهي تشرب الشاهي بهدوء:.. اتصل فيهم واخبرهم.. على كيفهم.. متى ما يبون انرووح لهم. وهذا اخر الكلام...
قمر كانت تطالع خليل اللي كان يبين عليه الضيج لكن ركب الدري واهو ساكت دلاله على الرضى... وخالد يشرب الشاهي واهو يضحك ويمسك يد قمر
قمر: لبيه ..
خالد ياشر لها بعيونه: ما عليج منه.. رضى.. يالله.. روحي خبري الرويتر عشان تنشر الخبر..
(الرويتر مريم)
قمر: ههههههه ان شالله

بالفعل.. اتصلت ام خليل في ام خليفة عشان تاخذ منها الرقم.. وخذته واتصلت في النزهه وطلبت منهم يوم ايزورونهم فيه.. وعطوهم يوم الثلاثاء اللي بط جبد خليل

ايزورونهم فيه.. وعطوهم يوم الثلاثاء اللي بط جبد خليل من الزين لانه بعيييد وايد... بس يالله دامه هالاسبووع يعني خلاص.. هاينة..
ويا يوم الثلاثاء واخيرررررررا... لولوة كانت قاعده اتعدل وجاسم يناظرها:.. انتي ليش اتعدلين؟
لولوة: بروح وياكم اشفيك رايحين نخطب لولد اخوووك
جاسم: واذا.. انا مابيج اتعدلين جذي اتصيبج عين ولا شي.. تراج قمر
لولوة بحيا: فددددديتك والله انت احلى حياتي
جاسم يلمها واهي قاعده: عمري.. لا تروحين.. قعدي وياي
لولوة واهي توقف تاخذ عباتها: تراك انت بعد بتيي ويانا والا ناسي الريايل هم رايحين
جاسم: أي صج... خلاص. عيل انا وانتيي انرووح وانرد بسرعة.. ماحب نطلع من البيت ونتاخر ..
لولوة: ههههههههههههههههههه فشلنا فشلنا.. ما كفاك بملجتنا ولا خطبتنا.. فشلتنا من الزييين
جاسم: الحين اللي يحبج ويسوي لج هالشي يطلع مفشلج.. اقول مو ويه هالحركات الروميووويه..
لولوة واهي تلمه: ويييييييي فديت روميووووي والله

مروة اللي كانت في بيت عمتها بالجهرا مخصوص لهالمناسبة.. اتصلت فيهن مريم وخبرتهن بالشي وما شاء الله الكل تلقى هالشي باستحسااان كبير.. خليل كان منااسب لنورة ونورة وحبها للعيال خلاها اتكون البرفكت عشان هالشي..
واهي كانت اترتب نفسها بكل اناقة وبهرجه في غرفتها مطلق اللي بعد كان لاز مايروووح يستعجلها
مطلق: يا حياتي والله الناس تنتظرها مو زين جذي انتاخر عليهم
مروة: لحظه شوي بس احط هالروج وخلاص انا جاهزة
وبالفعل حطت مروة الروووح وتمت اتكش بشعرها الحريري اللي طوول شوي ووقفت بصعووبه لانها في الشهر القبل الاخير للولادة.. وكانت بمنتهى الجمال والروعة..
ممطلق:: اااه يا قلبي.. ماقدر على هالجمال
مروة: ههههههههه عشان لا تستعجلني انا ان تونيت اسوي الشي برفكت.. العيله منها الندامة
مطلق: يا شيخة بسج هرج فاضي ويالله
وراحت مروة تلبس عباتها ومسكها مطلق من يدها وقربها
مروة: علامك؟
مطلق: احبج...
مروة: ههههههههه اموت فيك زين..
وراحت عنه
^^^^^
في غرفة قمر وخالد كان العكس.. مو خالد اللي يستعجل قمر وانما قمر اللي تستعجله.. واهو مثل الشي لامها وحاظنها ولا ماعطي اعتبار لاي شي.. قهر هالنوع من الرياييل اللي نفسهم نفسهم.. ماهمهم احد..
قمر: يا خالد والله حرااام اتعطلنا جذي.. كريه منك والله
خالد: .. في هواها من حياها عن النااس تخشى عيون الناااس تجرح هواها .. قالت هلا وتبسمت واشرق الماس وتعلقت روحي بعالي سماها
قمر: والله يا خالد حرااااااااااااااااااااااااااااااااااااااااااام عليك اللي تسويه فيني جذي
خالد : احبج قمر.. ( يحط راسه على جبينها ويلمها ولاثانية ميته منه لكن بعد اهم مستعجلين)
قمر: وانا بعد احبك حبيبي.. بس فكر في اخوك.. والله كريهه بحقه نسوي له جذي
خالد زعل:.. خلاص انتي روحي انا مو رايح
قمر شنووز؟؟؟؟؟؟؟؟؟
خالد: ايه.. اللي سمعتيه
وراح وانسدح على السرير..
خالد: يعني الحين عشان خليل تسوين فيني كل هذا.. عنبووو غيرج انا احبج..
قمر: وانا شقلت لك الحين... يالله خالد قوم والله مو حلوووو الجمع بليااااك.. انت شيخهم
خالد: غيرها عمري.. جربي غيرها
راحت قمر وقعدت على السرير ومسكت يده وباستها: حبيبي يلله قوم.. انت حبيبي وحياتي وتسمع كلامي.. وان ردينا.. لك اللي تبيه بس الحين قووم
خالد: تقعدين وياي وتسولفين وتخليني على كيفي؟
قمر: افا عليييييييييييك انت تامر امر والله..
خالد: وعد يا قمر؟؟
قمر: هههههههههههههههههههه هذي اصلا منيتي بس لان الوقت ضيج الحين ..فمن جذي استعجلك..
خالد: خلاااااص.. على وعدج
واهو يقوم عن السرير
قمر: افا عليك انت بس اجهززززز..
خالد يروح غرفة التبديل.. يبدل بسرعة ويطلع واهو كااااشخ
وقمر الثانية بعد اللي لابسه جلابية بيضافيها تطرييييز وردي على الحواف كانت جنان
خالد: ياويل عمري من هالجماااااااااااال الرباني..
قمر: يا ويل قلبيييييييييييييي من هالكشيخ.. لو سمحت .. ممكن نظرة
خالد: لج انا كلي وشلج بالنظرة..
قمر: ههههههههههههههههههههههههه
^^^^^^^^^^^^^^^^^^^^^^
الحشرة تحت كانت غير متوقعة خليل كان قاعد هادئ وساكن .. لكن متوتر ومريم اللي ترووغ الخدامات كل شوي الا سوو جذي والا العيال حطو بالكن عليهم ولا يصي فيهم شي ومادري شنو ومادري شنو... يعني فوضى وخصوصا بصوت مريم الرنااان
خليل:بس عاد سكتي والله انا متوتر وانتي توتريني زود ويا مشاحن صوتج هذا.. كرين نعنبووووووه
مريم :ههههههههههههههههههههههههه فديت المعرس المتووووتر.. ياجعلني فدوة لك يا خوي.. يالله اصبر ماباقي شي.. زين باكووو سمعيني عزوز ما يحب السيريلات سويله موووز.. يعني اهرسيه له..
الخدامه: جين ماما..
مريم: الحين روحيلهم شوفيهم في دارهم.. ولا ينزلوووون اقوللج..
ام خليل: بسج يا مريم والله زعزعتينا اليوم.. ها وينه اخووك
الا خالد نازل ويا قمر: وراج يمه
ام خليل واهي تلبس عبات الراااس.. صج انها كبرررت : يالله اجل سرينا..
خليل: ابوي وينه
ام خليل: روح عجله كاهو في مكتبه
راح خليل لابوووه وطلعو رباعه من المكتب... ومنها تحرك القووووم كله .. وتلاقوو عند الباب ويا جاسم وسعود وامه ومطلق ومروة
ام خليفة كانت اولريدي واصله هناااك من العصر .. ام ناصر كانت اتحسب انها عزيمة عايلية بسيطة بس نوفة اللي ماقدرت تسكر حلجها قالت لشيخة عن هالشي واللي خلاها تطيييييييييير من الفرحة
نوفة: واووووووووووووووش وطي حسج والله بتذبحني مرييم ان درت اني خبرتج..
شيخه: ماصدق ماصدق نوفووو نوووووورة بيخطبها خليل ماصدق..
نوفه: عيل حنا المصدقات.. ههههههههههه يالله الله يطرح البركة وانا اشوفهم متاخرين للحين ما جو..
شيخة :جون الحين.. طلال وينه
نوفه: اهو ويا ناصر في الميلس على ماظن ويا عمي وابوي
شيخه: يا فديته يا فديته ان درى بيطير في الهوى
نوفه: اقول مستخفة انتي على العرس
شيخة : كيفي عرسي وانا حررررررة..
^^^^^^^^^
نورة كانت في دارها قاعدة بكل دهدوء.. لابسه جلابية صفرا وفيها خرز يتدلى من الكتف.. وكانت انيقة ويا شعرها القصير الناعم.. كانت تتبسم للسما .. االله خليل عندنا الليله.. البن ظاحي كلهم عندنا.. يا هالفرحة والله.. مو متخيلتها.. ابد.. يارب يديم هالزيارات عشان قلبي المسكين ههههههههههههههههه

ووصلت السيارات الثلاث..

واول من طلع اهوو خليل.. فتتح الباب لامه عشان تطلع.. ومريم نزلت ويا دبتها وقمر ويا خالد ولولوة وجاسم ومطلق وسعووود..
ناصر اللي كان واقف بره راح لهم وسلم عليهم كلهم... واشر للرياييل عل الميلس.. وراحوو وياه والحرمات تلقتهن ام ناصر ودخلتهن ويا اختها...
ام ناصر في ميلس الحريم: زارتنا البركه يا هلا والله توه ما نور البيت بالظواحي
ام خليل: اللهيبارك فيج النور نوركم الغالية شلونكم شخباركم عساكم الا بخير..
ام ناصر: والله طيبين طاب حالج.. وفرحانين من هالزيارة والله زمن ما جيتو بيتنا
ام خليل: بس من يوم ورايح نجي لكم.. افا عليج رواحتنا نبي نغير جووو ..
ام خليل ما تكلمت بالموضوع اول .. اول شي قدعن الحرمات والبنيات اللي يلسن ويا بعض.. مثل قبل يوم كانن صغيرات وانساات.. االيوم نصهن معرساات وحوامل.. الحمدلله رب العالمين.. ونزلت نورة لهم..
نورة: السلام عليكم
ام خليل التفت لها وبنظرة كلها فخرررررر: وعليكم السلام هلا والله بنورة المصابيح كلهم يا حيا الشوووف..
نورة تسلم عليهن وتبوس ام خليل على راسها: شلونج خالتي عساج ابخير..
ام خليل: بخير بشوفتج الغلا.. اقربي جنبي هني.. واشرت لها وقعدت نورة يمها واهي ماسكه يد ام خليل بيدها..
راحن الحرمات بالسوالف الا وام خليل تنتظر خبر من بو خليل اللي هو راح يتكلم لبو ناصر..
^^^
بو خليل كان مخلص وكل شي.. وبو ناصر طبعا ما كان عنده اعتراض
بو ناصر: هاذي الساعة المباركة يا بو خليل.. وبنتي ما راح تلاقي احسن منكم ولا احسن من ولدكم.. بس تعرف بعد البنت لها شورها.. نسالها ونشوف رايها..
بوخليل:.. اكيد معلوووم ياخوي.. البنت واجب سالها عن هالشي.. واحنا سوينا اللي علينا وخبرناكم.. وننتظر منكم الجواب..
خليل كان متحقرص يبي الجوااب الحين.. ما يقدر ينتظر اكثر..
بو ناصر: على بركة الله واللي فيه الخير الله يجدمه.. ولو تبوون السؤال الحين حاظرين .. خير البر عاجله
بو خليل: على راحتك يا بو ناصر ممو مستعجلين..
بو ناصر:.. دامنا في هالجمعه الحلوة انروح نسالها اذا ماعندكم مانع
خليل كان يبي يتكلم بس سكت احتراما لابووه..
بو خليل: لا والله ما عندنا مانع.. شرايك يا ولدي؟؟ يروحون يسالونها؟؟
خيل ما تكلم بس هز راسه بالموافقة.. مالت علي اهز راسي جني اول مرة اعرس.. مالت علي
خالد وجاسم يضحكون عليه ويلتفت لهم بنظرة كلها شر..
وقعدوا الرياييل ويا بعض.. وطرش بو ناصر طلال للحرمات لانه اقرب واحد لهن.. يخبرهن عن هالشي عشان يسالووون نورة
اكيد ام خليل للحين ما تكلمت بس طلال راح يخبرها عشان تتكلم..
طلال يتحمحم يوم بيدخل البيت: يالله.. يالله حرمات تغشن وبنيات تفصخن طلال جاي.. هههههههههه
مريم: كلنا حريم كلنا بنتغشى ههههههههههههههه ماكو فايدة..
ام ناصر تقربه: قرب يا طلال.. يا حيااااك الله..
طلال يدخل واهو لابس دشداشه زرقه وشماغ احمر ودخل..: السلام عليكم
الكل : وعليكم السلام والرحمة
ام خليل: انت اشجابك هنا...
طلال: مليت من الرياجيل قلت اقعد ويا الحريم..يا فديت الروايح والله
ام ناصر: هههههههههههههه دومه هيلق..
ام خليفة: مفشلنا..
طلال: قسمي بالله اني مفشلج.. والله الا ميتة علي ..
ام خليفه: ههههههههه فديتك.. لكن يالله عطني مقفاك مالك مكان بين الحرمات..
طلال:طالع بس ابي كبيرتكن في كلمة راس.. ( يلتفت لم خليل) فديت ويهج ابيج في كلمة..
ام خليل : قول يا ولدي..
طلال: عمي يقوللج.. الموضوع ماشي.. بس باجي انتن.. سالن.. وردن علينا خبر..
ام خليل: الحين؟؟؟؟؟؟؟؟؟؟؟؟
طلال: ايه.. خير البر عاجله
والكل مستغرب .. طبعا اللي ماكان يدري.. لكن شيخة كانت بمثل حماااس طلال الليكل شوي يصد لها ويناظرها.. واخيرا بنجتمع واخيرا...
نورة استاذنت: عن اذنكم ارووح اشوف الشاهي ..
مريم: ويااااج..

: ويااااج..
راحت نورة الي كان قلبها يدق.. حست ان زيارتهم غريبة وكلام طلال كان اغرب؟؟؟ يمكن جايين يخطبون شيخة رسمي.. يالله ياريت والله.. بس لو جايين يخطبونها بيدخلون طلال؟؟؟؟ شالسالفة؟
واهي متوترة شوي ويطيح القلاص من يدها
مريم: فداااج سلمتي..
نورة واهي تنتفض:الله يسلمج.. مريم شالسالفة؟
مريم بخبث: أي سالفة...
نورة: ما بتقولين يعني؟
مريم: ههههههههههههههههههههه ماكو شي عشان اقوله.. يالله حملي هالاغراض..
الا ام ناصر تدخل لهم المطبخ.. يمه نورة.. تعالي معاي شوي
نورة بتوتر:... شنو يمه..
ام ناصر: تعالي معاي بغيتج في كلمة..
وراحت نورة ويا امها ..
وكلمتها ام ناصر بكل هداوى.
ام ناصر:.. يمه.. هذول يايين يخطبونج اليوم .. حق ولدهم خليل.. وابووج ما ردهم ولا انا بردهم.. بس ناطرين منج الجواب...
نورة انصدمت من صراحة امها ومن سلاستها في الكلاااام.. اللي قالته بسهوله زلزلها بقوووة.. خليل يخطبني؟
نورة: يخطبوني... انا... لخليل؟
ام ناصر تبتسم: أي يمة.. يخطبونج انتي..... وابوج مابينطرهم.. يبون يعرفون الجواب منج.. ولو اني اعرفه .. زين..
نورة: يمه.. انا.. ( تتلعثم نورة ما تدري شتقول.) يمه مادري..
ام ناصر:.. شنو ما تدري.. بسرعة قرري هالشي.. دومج فكرتي فيه.. الحين قوليه.. موافقة .. ولا لاء..
نورة سكتت واهي تجمع افكارها.. واهي اللي كانت تظن انها مخبية الشي عن الكل اثرها مكشوفه والكل يعرف انها تحب خليل وتموت فيه.. ياربي ياربي ماقدر اصدق لايكون حلمانة ولا ادري.. ياربي ارشدني للدرب الصح..
ام ناصر:... ها يمه.. شردج
نورة واهي تناظر امها وتحركت من مكانها لعند ريل امها..: .. يمة.. .اوافق؟
ام ناصر: ههههههههههههههههه جيف انا اللي بتتزوج.. انتي اللي بيدج.. ان كنتي شايفه عيب بالريال مصلحتج اهم.. وانت كنتي مرتاحة.. الله يجدم اللي فيه الخير..
نورة هزت راسها بعنف بموافقه:.. أي يمه.. أي... موافقة يمة.. موافقة..
ام ناصر ابتسمت وباست بنتها على جبينها ووقفتها..: يابنتي لا عمرج تفكرين انج يمكن تخبين شي على امج.. تراني عارفتج وعارفةاللي في قلبج قبل لا تعرفينه انتي...
نورة كانت شوي وتبجي..
ام ناصر: اروح ابشرهم؟؟
نورة هزت راسها واهي تحترق بالدمعات اللي بعيونها.. أي يمة..بشريهم..
ام ناصر:.. يالله عيل.. اخليج الحين..
راحت ام خليل ونورة واقفه مكانها في غرفة التلفزيون لحالها واهي ترتعش.. يالله يالله يالله ان كنت في حلم صحني منه لا انفجر بالوقع.. ياربي .. ياربي سهل علي.. سهل علي يا ربي...

بشرتهم ام ناصر وهللن الحريم على هالشي.. وطلال طااااار من الفرحة لابوه يبشره بالبشارة...
خليل من سمع التهاليل خلااص.. انفجر بركان صبره... وعرف انها وافقت.. وافقت نورة واااااااافقت.. يالله
طلال دخل وراح لعمه وقاله وباسه ووبو خليل بعد باس بو ناصر وباركو الرياييل فيما بينهم... وبعدها قعد بو خليل..
بو خليل: نتفق على المهر اجل..
بو ناصر: على بركة الله..
^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^ ^^^

شهرين في تحضير زواج نورة وخليل.. ما شافو بعض فيها ولا عرفو عن بعض شي... كل اللي يعرفونه ان الايااام ما ردها بتفوت وتقربهم من بعض بقوووو.. رباط ابدي لا يفرقه لا مخلوق ولا ادمي دام الخالق حارسه.. يالله .. حلم جميل .. ومحلى الاحلااام ليمن اتحقق.. تخلي الانسان مثل الطير يرفرف بلا جناحات لكن..
وجا اليوم الموعود.. لملجتهم.. املجو قبل ليله العرس بليلللله وحده.. كانت بسيطة وهادية.. وخليل سواها في بيت المزرعة لانه يبي الجو احلى واصفى.. ا
النبات كانن فرحانات لكن مروة ماحضرت لانها ولدت ويابت لهمم بنوته حلوة سموها حياة.. حياه مطلق... ومريم وقمر ونوفة ولولوة وشيخة مرتبشات ونورة.. اااه من نورة.. كان صبرها بلا حدود وهدوئها معدوووم التوتر في قلبها وعيونها ويدها اللي اتنافض.. الجو كان بارد وحميم لكنها ما حست بشي ابدا.. كانت النار اللي فيها عاميتها عن كل نسمة هوا وتحس انها راح تختنق..
مثلها مثل خليل اللي كان يرتعش ويا الرياييل يسلم عليهم بكل قله صبر.. يالله الله يتمم على خير لا يطلع لي شي في اخر السالفة ويوقف كل شي.. صبرك يارب صبرك...

وبالفعل.. تم كل شي.. الملاج وغيرة والتهاليل كاااااااااااااااانت ارفع ليمن وصل للسما.. وبانت الهداااااوة في الكل.. وخلص كل شي..
البنات كانن يرقصن ومرتبشات ونورة معاهمن.. ويات اللحظه اللي كانت تنتظرها نورة بفارغ الصبر... دخله خليل عليها... كانت تنتظر هالليلة عشان هالشي بس.. ومن بعدها ايصير اللي ايصير..
صح ان حفلتهم كان باجر وكان احلى لو تخليه الشوفه لباجر لكن خليل ما رضى واهي بعد ماحبت انها تطول.. وصارت الملجة وجا خليل يدخل عليها ويشوفها..
دخل خليل بكل هدوء ويااه امه وخواته طبعا الرياييل ما دخلوو عشان ان الحرمات ياخذن راحتهن.. قعد يم نورة واهووو مرتعش من الخاااااااطر على هالشي. ماحس انه يوم من الايام راح يقعد وياها بهالقرب.. وهالحميمية .. وبهالرباط..
يابت لهم قمر الدبل عشان يلبسوووونها .. واول ما مسك خليل يد نورة حسها باااااااردة وترتعش.. طبعا ما شاف ويهها لان الشال عليها ومغطيها.. لبسها الدبله واهي بعد.. وبعدين رفع الشال وشاف ويهها الي انطبعت صورته في مخيلته.. لدرجه انها ماكانت غريبة عليه يوم شافها.. لمها بخفه وباسها على جبينها بين عيونها .. بوسه عمره ما تخيل انه بيوصل لها.. الحمد لله يارب..
مريم كانت تبجي وقمر بعد وشيخة ونوفة... الكل حضر في بالهم وضحة.. وضحة اللي كانت تشهد هالرباط وهالسعادة الي اهي سبب في وجودها.. وضحة اللي تبارك لهم في السما هالزواج وهالتلاحم الروحي.. لان خليل محتاج لنورة ونورة محتاجه له.. ومستحيل يلاقي بنت تسره كثرها... يا رب.. يارب تظل هالفرحة دايمة بينهم.. وتخليهم دوم سوى.. ولا تفارقهم...
بعد الزواج بسبوعين ...
في بيت المزرعة..
نورة كانت قاعدة ويا العنود تركب لها المكعبات وابراهيم ويا ابووه عند الفروووس..
هذا كان شهر عسلهم.. ويا العيال.. نورة اللي طلبت جذي ماحبت انها تسافر لرووحها اهي تبي خليل وتبي عياله معااااه. وخليل ماقال شي بالعكس.. هذا الشي زاد حبه لنورة.. لكن الحيا بينهم للحين موجووود.. وخليل للحين ما تعود عليها..
وبعد الغدى في دارهم..
طلعت نورة من الحمام واهي تلف شعرها القصير في الفوطة وخليل قاعد على الكرسي اللي مجابل البلكوون الكبير... ويبتسم لها اول ما شافها واهي بحيا نزلت راسها.. وراحت عنده
نورة: علامك تتبسم؟
خليل:.. مو مصدق؟
نورة: شلي مو مصدقه
قرب خليل ويهه له:... مو مصدج انتي..
نورة واهي ميتة من تقربه له بهالشكل: .. ليِش؟
خليل يبتسم واهو يبعد الشعر اللي كان على جبينها:.. موو مصدق.. ان نورة اللي شفتها واهي صفيرة وشفتها ببيتنا . وشفتها في بيت عمي.. وكل مكان.. يوم من الايام راح تكون بداري.. وبين احظاني.. ولييي..
نورة ابتسمت بحيا ونزلت راسها.. خليل رفع راسها بيده الحنونه
خليل: طالعيني في عيوني ليمن اتكلم معاج.. ابي احسج معاي صج..
نورة: لك عيوني ولك احساسي ولك قلبي وعمري كله..
خليل:... اح.... اح... احبـــج نورة..
نورة تصنمت يوم سمعت هالكلمة من خليل... اول مرة يقول لها احبج من زواجهم للحين.. يحبها.. يحبها ياناس يحبها...
نورة نزلت راسها وحطته على حظن خليل... وهو نزل راسه لها
خليل : علامج؟
نورة تمسك رجله بقووووو : لا تخليني ابد.. دومك معي.. مابيك تروح عني.. ابد ابد..
خليل يلوي عليها واهو حاط راسه على راسها ويحبه...
نورة في قلبها كانت تصرخ كلمه احبك... لكن.. في هذيج اللحظه حست.. ان الكلااام.. ماله أي قيمة.. بينما الافعال.. اهي االلي تصنع المعجزات..

[ALIGN=CENTER]بكل الحب اقول لكم انتهت القصه
قصه مليئه بالمشاعر الانسانيه افتقدنا الكثير منها في هذا الزمن
قصه كلها حب وما يجلبه من سعاده ومتاعب
الان بعد ان انتهت القصه التي اخذت مني مجهود كبير لنقلها لكم احبائي
اتمنى ان تكون اسعدتكم وادخلت بعض الرومانسيه لمن افتقدها
بانتظار تعليقاتكم وكلماتكم
ونلتقي في قصه اخرى ان شاء الله
دمتم بكل الخير
هيفاء[/ALIGN]

شكراُ هيفاء على الثصه الروووووووووووووووعه

مشكورة حبيبتي هيوف على القصة اني قريتها من قبل عجبتني مرة وقريتها مرة
ثانية...
لكِ