الكاتب الأصلي: عاشق الورد
[c]
في ساعة صبح باتمشى
مابين الخضره والميه
لقيت الورد يندهلي
تعالى عندنا شويه
ومنهم ورده بتقوللي
داحبك إنكتب ليا
جريت وبلهفه أقطفها
واشيلها جوه ف عنيا
قالت لي إوعى تقطفني
دا حبك انغرس فيا
تعالى وقوللي كام كلمة
كلامك عندنا غيه
مسكت الغصن ورفعته
قالت لي الشوك ياعينيا
انا خايفه يجيك جرحه
تعالى وشيل بحنيه
مسكت الورده بين يدي
لقيت اوراقها بتندي
وشوفت اوراقها تتلون
بلون الاحمر الوردي
لمست الورده بشفايفي
ومريتها على خدي
لقيت نسمة عبيرعدت
وضحكت قبل ماتعدي
ضحكت وضحكتي اتمدت
يافرحة قلبي مين قدي
وانا سرحان مع الورده
لقيت النوم جاي عندي
حضنت الورده بإيديا
خايف لاتروح من يدي
سرحت في نومي مطَّمن
وهيه معايا.. ياوعدي
لقيت الورد صحاني
وقاللي الشمس جات حدي
صحيت وشفايفي ع الورده
بوشوشها بكلام وردي
قالت لي امتي نتقابل
واجدد باللقا ودي
جاوبت وقولت كام كلمه
في ساعة صبح ياسعدي
ـــــــــــــ
مع تحيات
عاشق الورد
حسني جاد
[/c]