تحت عنوان كونى مريمية واتق الله أختاه
---------------------------

هحكيلكم موقف شوفته امبارح بعينى فى الكلية

ولد ماشى حاطت الموبيل فى جيبه و حاطت سماعه واحده من سماعات الموبيل فى ودنه

عارفين السماعة التانية فين ؟؟

حاطتها فى ودن صاحبه

عارفين كان بيكلم مين ؟

كان بيكلم صحبته ؟وهو بيقولها هقولك على حاجه وراح صاحبه شاورله لا ما تقولهاش كده

وعمال يقوله ويشاورله قولها كذا !!!

متخيلين معايا الموقف

ولد وبنت بيحبوا بعض وهو بيكلمها وهى فاكره ده فارس الاحلام والرجل المنتظر وكل الكلام ده

وحضرته اللى هى باعت ثقه اهلها وخلت ربنا يغضب عليها بسببه

بيخلى صاحبه يسمع المكالمه بتاعتهم ويسمعها بقى وهى بتقوله كل حاجه

بيسمعها وهى بتقوله كلام الحب والغرام بيسمعها وهى بتحكى وبتشكى من اهلها القاسين الشريرين ؟

بيسمعها وهى بتحكى عن احلامها مع الفارس الهمام محقق الاحلام

انا مش هوصفلكم شعورى بجد ساعتها

حسيت بحسرة رهيبة .,,, انه للدرجة دى هانت عليك بنات المسلمين

يعنى مش بس بتكلم بنت من ورا اهلها لا ده انت كمان بتفضحها قدام اصحابك وبتخليهم يسمعوا المكالمات

كان جوايا حسرة على البنت دى انتى خونتى ثقه اهلك وخونتى امانه ربنا انك تحافظى على نفسك
وخونتى زوجك فى المستقبل

وكما تدين تدان نفس الشخص اللى حبتيه خان ثقتك فيه

للدرجة دى انتى صغيره فى نظره !! للدرجة دى انتى ما تهميهوش علشان ما يخافش عليكى ؟؟

ليه بتعملى فى نفسك كده ؟ ليه ترخصى نفسك اووووووووووووى كده

يا خسارة يا خسارة يا كل بنت باعت نفسها علشان متعة وقتية

يا خسارة يا كل مسلمة ضيعت نقائها وحيائها بإيديها علشان تسمع

كلمة حب ولا تنظر نظرة حرام لرجل لا يحل ليها

بس فى نفس الوقت لسه فيه امل!!

فيه امل تتوبى وترجعى لربنا تانى ,, بابا التوبة دايما مفتوح

صدقينى ربنا هيبدل سيئاتك حسنات مش هو اللى قال فى القرآن

إلّا من تاب وآمن وعمل عملا صالحا فأولئك يبدّل اللّه سيّئاتهم حسنات وكان اللّه غفورا رحيما

يلا يلا بقى يا كل مسلمة كفاية ذنوب كفاية ترخصى نفسك وتنزلى من قيمتك وتهينى أهلك ودينك وأمتك

جه الوقت اللى لازم تفوقى فيه وتدورى على مصلحتك

مصلحتك انه قلبك ملك ربك وبس مش ملك لأى شاب ياخده يلعب بيه ويهينك ويخليكى فرجه لكل الناس ؟؟

بالله عليكى فوقى ودورى على مصلحتك ,, وصدقينى انا شوفت قصص حب كتير

وكل واحده كانت بتقول الا حبيبى فلان اللى انا مرتبطه بيه غيرهم كلهم
ده عمره ما يسبنى ولا يخونى ولا ...

وفى الاخر بتاخد الصدمة ومحدش بيقف جمبها الا ربنا اللى هى عصت اوامره وبعدت عنه فى الاول

يبقى من الاول يا اختى يا حبيبتى يا مسلمة ارجعى لربنا اللى بيحبك الحنين عليكى اللى اداكى قلبك الجميل اللى بيحب وبيشتاق للحب الحلال ده

وتأكدى انه ليكى نصيب ورزق فى زوج ماحدش هياخده غيرك مهمها عدى الوقت ومهما حصل !!

نسأل الله أن يهدى شباب وبنات الاسلام ويردهم إليه ردا جميلا عن قريب ..

اللهم آمين ....
__________________

منقول من صفحتنا في الفيس بوك
أنا هكون يوسف وانتي هتكوني مريم ومش هنحب الا ازواجنا