نسيم الليل
ـــــــــــــــ
تِحِب إهواك قالـَوا
قِلِت حيل أهــــــــــــواه
قالـَوا مايـِحِبَك
ماتِجي إبطـَـــــــــــــرواه
قِلتِلهم تـَرِف يخجَل من نـَسيم إلليـل
ويخِدشَه إلفـَجر مَحبوبي لو مَراه
مِثِل قِداح يـِذبَل مِن تِلِمسَه الايد
بَس ولفي عِطر يـِطيه لو شَمــــــاه
حبيبي إيذوب مِن كِلمَة غَزَل وياي
روحَه إتذيه مِن تِنطِق حبيبي إ شفـاه
وآنه أدري إبحبيبي إوموزِنـَه إبشاهود
وأندَل وين حبيبي إبيا كِتِر خـَبــــــاه
يـِتوَزَع حبيبي إوبين إديَه إيضيع
لو صَدفـَه حبيبي إبيا طِريج ألقــــاه
أخاف إعليه مِني لو شِبَقتـَه إيموع
قـَلبي إيفِز فـَرَح جِدامي يـِتلـَقـــــاه
بَرحِيَه حبيبي إويـِنَع حَد إلغيص
خي عونـَه إليـِلوحَه إوربَح مِن يـِحواه
حبيبي إخدوده تين إعيونـَه تِطي ألوان
وَأتلى إلليل هِندِس شَعرَه لو فـَـــــــلاه
حبيبي إبلا حَسَد يـِسواله سِت نِسوان
بَدِرها إلدنيا يـِخجَل مِن سِحِر عينــــاه
حبيبي إبلا شَمِس لوهَل يـِنور إلبيت
حَل بيها إلكِسوف إوما تِضاهي إويـاه
إومَرَه أذكر حبيبي إنخِدَش تـَحت العين
إجَت إيدي إعلى خـَدَه كـِنت أظنها إدواه



مشير السعيدي

جميل ان يكن لك قلب ولكن الاجمل ان يكن لك صديق انت قلبه