خربشة كلام .... الى سرب الحمام
[c]
ياسرب الحمام يامبعثر
اتجمَّع ليلعبوا بيك
دا نسور السما بتتنمر
وعيون الحدادي عليك
***
والشارده ياسرب ياويلها
الأصلع ده عينه منها
والأصلع ده نسر لعين
يتمنى لوحده ينولها
***
ويقصقص في ريشها شوية
وتكون له ضحية هنيه
لاتقاوم ولا تقول لأه
وساعتها تكون منسية
***
وتهمهم ياسرب حمام
وتنوَّح كما الأيتام
والأصلع يبص ويضحك
من خيبتك يابو الأوهام
***
يانايم قوم اصحى وفوق
شوف دايرك صبح محروق
والأصلع ده جهز نفسه
للتانية بلهفة وشوق
***
والتانية ياعيني عليها
الداهية حترسي عليها
واهي لما ماتلقاش مهرب
حيلف الحبال حواليها
***
ويقولوا كده ف تصاريح
ليه طايره بعكس الريح
وياريتها ياسرب ماتخضع
صدقني كلامي صحيح
***
واتحرر من العبودية
وعيونك على الحرية
واتجمع ياسرب حبيب
اتجمع ياغالي عليه
***
ونسور السما راح تبعد
وتخاف لما تيجي عليك
ياسرب الحمام اتوحد
وساعتها مايلعبوا بيك
***
وانتهت خربشة الكلام الى سرب من الحمام[/c]
|