|
رد: حتى أبليس هاجر من مصر , علي سلامه
بكلمك من مصر
بكلمك من مصر..
مصر ياسيدي ,,,, مصر..
مصر يا عم مصر..
مصر بالصاد..
مصر كل يوم مزاد..
مصر بنات وولاد..
بتنسرق أحلامهم..
مصر أصحاب المعاشات..
والبهدلة ف آخر أيامهم..
ومصر ناس كل اللي معاهم..
وف قلوبهم ووراهم وقدامهم
مصر..
مصر بالميم..
آه واللّه العظيم..
بكلمك من مصر..
مصر بالآه..
مصر كل يوم..
يا حد راح
يا حد تاه..
إستطعم الاسم كده..
وإنت بتنطقه..
أو بتكتبه..
أو حتي لسه بتتهجاه..
مصر..
مصر اللي لو يوم تغني من قلبها..
غصب عنك..
...... لازم تقول اللّه..
^
^
^
مش بتاع كده
لما أنا مش بتاع كده..
ولا بتاع كده ولاكده..
أمال أنا بقي..
أبقي بتاع إيه..
لما أنا مش شيخ..
ولافلتان..
لما أنا مش فايق..
ولا سكران..
وساعات يتهيألي..
إن أنا فرحان..
أتنطط وأصرخ..
وأقول هيه..
لما أنا مش أفندي..
ولافلاح..
ولا شجرة جميز..
ولا تفاح..
لا أنا بتألم ولا مرتاح..
لا عندي شيء استناه..
ولا عندي شيء أبكي عليه..
ولما أنا شايف الحال بقي كده..
طب ساكت ليه..
يا عم أنا مش بتاع كده..
فيه إيه!
^
^
^
^
خايف ابص من الشباك فجأه ومالاقيش مصر
ساعات بقلق بالليل
يعني بالليل شوية كده
قبل الفجر
حسب الظروف كده
بعد العصر
خايف يوم أصحي..
وأفتح الشباك..
مالاقيش مصر
ألاقيها لمت هدومها ومشيت
لمت هدومها
علي نيلها
علي هرمها
وطفشت
وحلفت ميت يمين ماهي قاعدلنا
ماهي زهقت..
تعبت..
إتخنقت
أصلنا زودناها..
أكننا استعمرناها..
ورثناها
مصر البنوتةالحلوة
اللي زي القمر
بقت عجوزة وشايبة
وبان عليها الكبر
خايف يوم أصحي..
وأفتح الشباك..
مالاقيش مصر
|