منتديات زهرة الشرق - سحر العيون (شعر شعبي عراقي)

سحر العيون
ــــــ
ألذ مابيك صوتك مِن يرن بأذني
موسيقى إولحن وي صوتك إتشدنـي
وأرجف كلي من صوتك رجف بردان
وأخذف مدري خايف لو يدغدنــي
ياخذني فكر وتردني كثره افكار
واسهى إيعيد صوتك يرد ينتلنـــي
وألذ مابيك إسمك من يجي إعلى البال
يلعب لِعِب بيه إوحيل يخبصنــــي
هذا إسمك إوصوتك لعب بيه إطروق
متكلي إمن أشوفك شتعرف منـــي
يالمبعد تعال إوجرب إمن الروح
جَلبني إعلى كيفك خلبص إوحلنـــي
يل هليت وي آخر سواد الراس
إوبطراف إلسنين إلباقيه إبسنــــي
زاعلت إلظِحِك طلقت إلافراح
بس قلبي ركيك إوبيك وهدنـــــي
تِوكل قول يالله إوخل نِكمل إلسير
ولو أدري عليك إلناس تحسدنـــــي
خل تحسد تنمنم واليقول إيقول
إوجدام إلوشالك ولفي غازلنــــــي
وإشبقني شبق لفني إوي يطولك طول
إوظم راسي إعلى صدرك وإبكي وإحظني
إوخل تعرق إبكفك كفي وتذب ماي
وإبجيدي إعلى كيفك قَبل إوشمنــــي
إومسدني إبيمينك وإمسَح إعلى الراس
وإبحرقة إمفارج هزني وانكثنــــي
حيث آنا إمنشوفك مني روحي إتذيه
بعيونك حبيبي إمن أصد تِسحرنـــي
منا إمشذون وإجيتك منك أبغي إمراد
مردتني إلسنين إبشو? سامرنــــي
تعال إودش لقلبي إوزعبل إشمابيه
إونظفه إمن إلعتيج إوللزغر ردنـــي
إولوليلي إبدلول إليهل يهواي
إورضعني حنان إبعطف ?مطنـــــي
وإكتبني قصيده إوبيه بَحِر زين
وإقراني إعلى كفيك لَمن تحفظنـــــي
وإذا مليت شقها إوذبها بالتيزاب
إوحرج ورقتي إومن قلبك إشطبنــــي
لأن بيه إلتَعَب يهتك صبر أيوب
ولايعقوب وَن لَبنَه مُل ونــــــــي
وألذ مابيك كلك ياألذ مني
ياقبل إلفرح هليت تِفرحنــــــــي

مشير مطرب السعيدي